«Սուրմալու»-ում տեղի ունեցած պայթյունի հետևանքով անհետ կորածներն 8-ն են. որոնողական աշխատանքները շարունակվում են
Երևանի «Սուրմալու» առևտրի կենտրոնի տարածքում տեղի ունեցած պայթյունի հետևանքով անհետ կորածներն այս պահի դրությամբ 8-ն են: «Արմենպրես»-ի փոխանցմամբ՝ այս մասին նշված է ՀՀ արտակարգ իրավիճակների նախարարության կայքում:
Անհետ կորած 8 քաղաքացիներն են Գագիկ Կարապետյանը, Արտավազդ Հայրապետյանը, Վանիկ Ամիրխանյանը, Կսենիա Բադալյանը (ծնված 1981 թ․), Արամ Հարությունյանը, Դավիթ Մխիթարյանը, Մեհրի Թահերին (ԻԻՀ քաղաքացի) և Գեղամ Պետրոսյանը (ծնված 1985 թ․)։
Երևան քաղաքի ԲԿ-ներ է դիմել 60 քաղաքացի, որոնցից 12-ը շարունակում է բուժում ստանալ, իսկ մնացած 48-ը, ստանալով համապատասխան բուժօգնություն, դուրս է գրվել։
Հիշեցնենք, որ օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ Երևանի Արշակունյաց 15 հասցեում գտնվող «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ, ինչի հետևանքով եռահարկ շինությունը մասնակի փլուզվել է։