Առողջապահության փոխնախարարը մասնակցել է ԱՊՀ համագործակցության խորհրդի 28-րդ նիստին
Առողջապահության նախարարի տեղակալ Լենա Նանուշյանը մասնակցել է ՌԴ Սարանսկ քաղաքում անցկացված Առողջապահության բնագավառում ԱՊՀ համագործակցության խորհրդի 28-րդ նիստին:
Հանդիպման օրակարգում էին ԱՊՀ անդամ երկրների ներկայացուցիչների միջև առողջապահական ընդհանուր խնդիրները, առողջապահության բնագավառում ընթացող միջպետական գործընթացներին ԱՊՀ անդամ առանձին երկրների մասնակցությունն ապահովելու հարցեր:
Նիստին մասնակցող երկրները բարձրացրել են արդի հարցեր, որոնց շարքում կարևորվում են երկրների միջև ստորագրված պայմանագրերի ու որոշումների կատարման ընթացքի գնահատումը, ԱՊՀ շրջանակում օրենսդրական մոդելային բարեփոխումների ընդունման, ինչպես նաև մի շարք հիվանդությունների դեմ համատեղ պայքարի ընդհանուր գործողությունների մշակումը:
Մոսկվա այցի շրջանակներում Նանուշյանը զրուցել է նիստի աշխատանքը վարող ՌԴ առողջապահության նախարար Վերոնիկա Սկվորցովայի հետ: Ռուս գործընկերների հետ քննարկումներն առնչվել են երկկողմ հետաքրքրություն ներկայացնող մի շարք հարցերի, մասնավորապես, նաև հոգեբուժությանը, աղետների բժշկությանը, ոչ վարակիչ հիվանդությունների կանխարգելմանն ու հակազդմանը, տուբերկուլոզի դեմ պայքարին:
Նանուշյանն այցելել է նաև ռուսական դեղագործական ընկերություն, որտեղ քննարկվել են ոլորտում հնարավոր գործակցության ուղիները:
