Բնական մաքրող միջոցներ մաքուր ու առողջ մաշկ ունենալու համար
Առողջ լինելու, մաշկային խնդիրներից խուսափելու, ինչպես նաև գեղեցիկ ու երիտասարդ մաշկ ունենալու համար մարդը պետք է անպայման հետևի իր մաշկի մաքրությանն ու օրական գոնե երկու անգամ մաքրի այն: Այս պրոցեդուրան հատկապես կարևոր է քնելուց առաջ, քանի որ այն կօգնի ազատվել օրվա ընթացքում կուտակված աղտից ու կբացի մաշկի ծակոտիները:
Ձեր ուշադրությանն ենք ներկայացնում նման բնական միջոցներից մի քանիսը, որոնք կօգնեն մաքրել մաշկը և կպաշտպանեն տարբեր խնդիրներից:
Մեղրով մաքրող միջոց
Մեղրը հիանալի միջոց է ինչպես յուղոտ, այնպես էլ չոր ու նորմալ մաշկի համար: Այն խոնավեցնում է մաշկը, ազատում է պիգմենտային հետքերից ու բշտիկներից: Պարզապես հարկավոր է քսել հեղուկ մեղրը մաշկին, մի փոքր մերսել և լվանալ ջրով: Այս դեպքում մեղրը կիրառվում է հեղուկ օճառի փոխարեն, ուստի այն մաշկին երկար թողնելու անհրաժեշտություն չկա:
Կաթով մաքրող միջոց
Կաթը նույնպես հիանալի միջոց է մաշկը մաքրելու համար: Ընդ որում այն կարելի է կիրառել նաև շպարը մաքրելու համար: Այն ոչ միայն կմաքրի մաշկը, այլև կթարմացնի այն, կսնուցի ու կխոնավեցնի: Պարզապես հարկավոր է բամբակյա սկավառակը թրջել կաթով, քսել այն մաշկին (կարելի է նաև աչքերի ու բերանի շուրջը), այնուհետև սրբել մաքուր բամբակյա սկավառակով:
Ծովի աղով մաքրող միջոց
Շատ արդյունավետ մաքրող ու շերտազատող միջոց է նաև աղը: Այն կարող է օճառին լիարժեք փոխարինող միջոց լինել, քանի որ ոչնչացնում է բակտերիաները, մաքրում է ծակոտիները, շերտազատում է ու գունաբացում մուգ հետքերը:
Հարկավոր է աղին ավելացնել մի փոքր նշի յուղ, շրջանաձև շարժումներով քսել խառնուրդը խոնավ մաշկին, այնուհետև լվանալ մեծ քանակությամբ գոլ ջրով:
Յոգուրտով մաքրող միջոց
Յոգուրտը մաքրում ու խոնավեցնում է մաշկը, իսկ դրան մի քանի կաթիլ կիտրոնի հյութ խառնելու դեպքում կարելի է հասնել էլ ավելի լավ արդյունքի: Այս խառնուրդը մաքրում ու թարմացնում է մաշկը և ազատում է պիգմենտային հետքերից ու բշտիկներից: Հարկավոր է քսել յոգուրտը կամ յոգուրտի ու կիտրոնի հյութի խառնուրդը մաշկին, թողնել 10-15 րոպե, այնուհետև լվացվել ջրով: Հարկ է հիշել, որ կիտրոնի հյութով մաքրող միջոցը չի կարելի օգտագործել առավոտյան, քանի որ արևի ազդեցության հետևանքով այն կարող է դառնալ պիգմենտային հետքերի պատճառ:
Նյութի աղբյուրը՝ med.tert.am