Գրի՞պ, թե՞ մրսածություն. ինչպես տարբերակել
Գրիպը և այդքան տարածված մրսածության հարուցիչները վիրուսներ են: Գրիպի ախտանշանները զարգանում են ավելի ինտենսիվ և կտրուկ, քան մրսածությանը, որոնք հակում ունեն աստիճանաբար զարգանալու: Փորձենք պարզել՝ ինչ են իրենցից ներկայացնում այս երկու վիրուսները:
Գրիպը սպեցիֆիկ տիպի ինֆեկցիա է, հարուցիչը հիմնականում գրիպի A կամ B տեսակի վիրուսներն են: Մրսածությունը, ի տարբերություն վերը նշվածի, կարող է հարուցվել հազարավոր այլ տեսակի վիրուսներով: Հիմնական տարբերակիչ փաստն այն է, որ գրիպը ավելի սիստեմային ախտանիշներ է ի հայտ բերում, ինչպես օրինակ՝ ջերմության բարձրացումը, մարմնի ջարդվածության զգացումը, իսկ մրսածությունը կարող է սահմանափակվել միայն քթի արտահոսքով, կոկորդի ցավով կամ որոշակի հազային ախտանիշով:
Գրիպի նշաններն են
- Ջերմության բարձրացում 37 և ավելի
- մկանային ցավ՝ կենտրոնացված ոտքերում և մեջքի շրջանում
- քրտնարտադրություն
- գլխացավ
- չոր հազ
- հոգնածություն և թուլություն
- քթարտադրություն
- կոկորդի ցավ
- ախտանիշների հանկարծակի ի հայտ գալը
Եթե Դուք ունեք վիրուսային ինֆեկցիա, հավանականությունը մեծ է բակտերիալ վարակ ձեռք բերելու: Ռիսկային գործոնը հատկապես կբարձրանա սինուսիտ, բակտերիալ թոքաբորբ կամ թոքային ինֆեկցիա ձեռք բերելու հարցում:
Եթե Ձեզ թվացել էր, որ գնում եք դեպի լավացում, գրիպից կամ մրսածությունից հետո, սակայն տեղի է ունենում ջերմության բարձրացում կամ կրկին ինքնազգացողության վատացում, դիմեք բժշկի. այս նշանները կարող են վկայել բակտերիալ ախտահարման մասին: Անտիբիոտիկների օգտագործումը գրիպի շրջանում չի օգնի Ձեզ խուսափել երկրորդային բակտերիալ ախտահարումից, և հակավիրուսային պրեպարատների օգտագործումը ազդեցություն կունենա միայն գրիպի А, В հարուցիչների դեմ, բայց ոչ մրսածության վիրուսի դեմ:
Մրսածության նշաններն են
- Արտադրություն քթից
- Ցավ կոկորդում
- Հազ
- Ախտանշանների աստիճանաբար զարգացում
Ինչպես նշում են մասնագետները՝ մրսածության դեմ բուժում չկա, սակայն կան բաներ, որոնք անելով Դուք ավելի լավ կզգաք Ձեզ:
Առաջնային խորհուրդներից են
-շատ հանգիստը,
-առատ հեղուկների օգտագործումը,
-ախտանշանային բուժումը, օրինակ՝ հակաբորբոքային պրեպարատների օգտագործումը:
Մրսածության 10-14 օրից ավել ձգվելու դեպքում այցելեք բժշկի, քանի որ հնարավոր է որոշակի բարդություններ են զարգացել: Իսկ վիրուսի տարածումից խուսափելու համար հետևեք հիգիենայի կանոններին և ուշադիր եղեք Ձեր անձնական օգտագործման իրերին: