Կովի՞, թե՞ այծի կաթ․ ո՞րն է ավելի օգտակար փոքրիկի համար
Նորածինների համար մայրական կաթը, թերևս, անփոխարինելի է․ բնական սնուցումն առավել կարևոր է փոքրիկի համար։ Սակայն երբեմն պատահում է, որ մայրիկը ստիպված է լինում արհեստական կաթնախառնուրդի կամ էլ կովի և այծի կաթով սնել փոքրիկին։
Մանկաբույժ Մերի Մինասյանի օգնությամբ այս անգամ փորձել ենք պարզել՝ ո՞ր տարիքից սկսած կարելի է կովի կամ այծի կաթ տալ երեխային և ո՞ր տեսակի կաթն է առավել օգտակար փոքրիկի համար։Բնական սնուցման բացակայության պարագայում մինչև 2 տարեկանը անհրաժեշտ է երեխային սնել արհեստական կաթնախառնուրդով, քանի որ մինչև այդ տարիքը խորհուրդ չի տրվում այծի կամ կովի կաթ օգտագործել։
Կովի՞, թե՞ այծի կաթ
Ըստ մանկաբույժի՝ այծի կաթն առավել օգտակար է, թեպետ դժվար է ձեռք բերել։ Գյուղական համայնքներում այծի կաթ գտնելն ավելի հեշտ է։ Այծի կաթը կովի կաթի համեմատությամբ ավելի քիչ ալերգեն է և դյուրամարս։ Թեև այծի կաթն ավելի մեծ քանակությամբ ճարպաթթու է պարունակում, քան կովի կաթը, այնուամենայնիվ, այծի կաթը չի պարունակում ագլուտին, հետևաբար փոքրիկի ստամոքսում այդ ճարպային գնդիկները միմյանց հետ չեն սոսնձվում, ինչն էլ հեշտացնում է կաթի մարսումը։
Այծի կաթը պարունակում է նաև ավելի մեծ քանակությամբ սպիտակուց, այն նաև միկրոէլեմենտների և վիտամինների շտեմարան է։ Թեև կովի կաթը ևս հարուստ է վիտամիններով և միկրոէլեմենտներով, բայց տոկոսային հարաբերությամբ այն զիջում է այծի կաթին։ Օրինակ՝ այծի կաթը պարունակում է 47%-ով ավելի շատ վիտամին A, 14%-ով շատ կալցիում, 24%-ով շատ B6, B12 և պղինձ։
Այծի կաթն իր բաղադրությամբ ավելի մոտ է մայրական կաթին։ Ճի՛շտ է, արհեստական կաթնախառնուրդը ևս հագեցած է վիտամիններով, մասնավորապես D վիտամինով, բայց դրա բաղադրության մեջ կալցիումն ավելի քիչ է, քան մայրական կաթում։ Հետևաբար այծի կաթը կարող է փոխարինել մայրական կաթին, քանի որ, ինչպես արդեն ասացինք, պարունակում է մեծ քանակությամբ կալցիում։
Հեղինակ՝ Նորա Հայրապետյան