Հայ-ռուսական առողջապահական 3-րդ համաժողովը` սեպտեմբերի 26-ին
Սեպտեմբերի 26-ին, ժամը 09:00-ին Գաֆէսճեան արվեստի կենտրոնի «Գրիգոր Խանջյան» սրահում կմեկնարկի Հայ-ռուսական առողջապահական 3-րդ համաժողովը։ Պլենար և սեկցիոն նիստերը կընթանան նաև «Սասունցի Դավիթ» սրահում:
Համաժողովի աշխատանքներին մասնակցելու նպատակով Հայաստան կժամանի Ռուսաստանի Դաշնության առողջապահության նախարար Վերոնիկա Սկվորցովայի գլխավորած պատվիրակությունը:
Հայ-ռուսական առողջապահական 3-րդ համաժողովի ընթացքում կքննարկվեն երկու երկրի համար հետաքրքրություն ներկայացնող համագործակցության հարցերի ամբողջ շրջանակը:
Համաժողովի բացմանը հաջորդող պլենար նիստերում Հայաստանի և Ռուսաստանի առաջատար մասնագետները կքննարկեն առողջապահության ոլորտի մի շարք կարևոր հարցեր, որոնց թվում են՝ առողջապահական բարեփոխումները Հայաստանի Հանրապետությունում և Ռուսաստանի Դաշնությունում, հակածխախոտային քարոզարշավի ձեռքբերումներն ու արգելքները, բժշկական զբոսաշրջություն և այլն:
Գործընկեր երկրների առողջապահության ոլորտի պատասխանատուները զուգահեռ սեկցիոն նիստերում նաև անդրադարձ կկատարեն Եվրասիական տնտեսական համագործակցության դեղաքաղաքականության ոլորտում ինտեգրացիոն գործընթացներին, արտակարգ իրավիճակներում առողջապահական համակարգերի արդյունավետ փոխգործակցության զարգացման հեռանկարներին, միգրանտների առողջությանը վերաբերող և այլ հարցերին:
Համաժողովի ավարտին երկու երկրի առողջապահության նախարարությունների միջև հանրային առողջության ոլորտում նախատեսվում է <Հանրային առողջապահություն > գիտական ամսագրի համատեղ ստեղծման համաձայնագրի ստորագրում, համաժողովի արդյունքների մասին համատեղ հայտարարության ընդունում: