Հանդիպումներ Առողջապահության համաշխարհային ասամբլեայի շրջանակում
Ժնևում ընթացող Առողջապահության համաշխարհային ասամբլեայի շրջանակում Հայաստանի Հանրապետության առողջապահության նախարարի պաշտոնակատար Լևոն Ալթունյանը և փոխնախարար Սամվել Մարգարյանը Ռուսաստանի Դաշնության առողջապահության նախարար Վերոնիկա Սկվորցովայի հետ քննարկել են առողջապահության ոլորտում երկու երկրի համագործակցության արդյունավետության բարձրացմանը վերաբերող հարցեր։
Հայաստանի պատվիրակությունն այսօր հանդիպել է նաև Պատվաստումների և պատվաստանյութերի գլոբալ դաշինքի (ԳԱՎԻ) ղեկավարության հետ։ Լևոն Ալթունյանը շնորհակալություն է հայտնել Հայաստանին նոր պատվաստանյութերի ձեռքբերման և դրանց ներդրման, պատվաստումային ծառայություններին շարունակական օժանդակության համար։
ԳԱՎԻ-ի ղեկավարների կողմից բարձր է գնահատվել Հայաստանում իմունականխարգելման ազգային ծրագրի իրականացումը, նոր պատվաստումների ներդրման գործընթացը, ինչի արդյունքում լուրջ ձեռքբերումներ են գրանցվել վարակիչ հիվանդությունների կանխարգելման և մանկական մահացության կրճատման ուղղությամբ։
Հանդիպման ընթացքում քննարկվել են առաջիկա համագործակցության զարգացման հնարավորությունները։
Առողջապահության համաշխարհային ասամբլեայի 70-րդ նիստի աշխատանքները շարունակվում են։