Մասնագետները ներկայացրել են ՝ որոնք են ջրի մեջ ծննդաբերելու առավելությունները
Գոյություն ունի ծննդաբերության մի քանի մեթոդ, որոնցից մեկը՝ ջրի մեջ ծննդաբերելու պրոցեդուրան ներկայում բավական հայտնի է: Սա պայմանավորված է նրանով, որ այս մեթոդն ավելի անվտանգ է, քանի որ դրա ժամանակ ծննդկանի՝ առաջին ու երկրորդ կարգի պատռվածքներ ստանալու հավանականությունը զգալիորեն նվազում է:
ԱՄՆ-ում Միչիգանի համալսարանի մի խումբ մասնագետներ վերլուծել են ավանդական եղանակով ավելի քան երկու հազար ծննդաբերության վերաբերյալ ստացված տեղեկությունները, ինչպես նաև ուսումնասիրել ջրի մեջ ծննդաբերելու պրոցեդուրայի առանձնահատկությունները: Ընդ որում՝ այս եղանակով երեխա լույս աշխարհ բերել համաձայնվել է 400 երիտասարդ կին:
Հետազոտության համահեղինակ Լիզա Քեյն Լոուն ընդգծում է, որ ծննդաբերության այս եղանակը թույլ է տալիս մեղմել ցավոտ զգացողություններն ու նվազագույնի հասցնել նորածինների մոտ սթրեսի մակարդակը: Սակայն միաժամանակ կա տարածված կարծիք, որ ծննդաբերության այս մեթոդը բարձրացնում է փոքրիկի խեղդվելու կամ վարակվելու հավանականությունը, ինչի հետևանքով շատերը խուսափում են այս պրոցեդուրայից:
Մասնագետները նշում են, որ այս պրոցեդուրայի դեպքում անչափ կարևոր է փորձված մանկաբարձերի ներկայությունը: Բանն այն է, որ այս մեթոդն ունի մի շարք առավելություններ, սակայն միևնույն ժամանակ հարկավոր է շատ զգոն լինել և ժամանակին դուրս բերել փոքրիկին ջրից, որպեսզի նա առաջին անգամ շնչի արդեն ջրից դուրս, գրում է actualnews.org կայքը:
Նյութը՝ tert.am