«Չափազանցված» մազահեռացում
Այսօր ինտիմ զոնայի մազահեռացումը բավական տարածված միջամտություն է դարձել: Սակայն պացիենտների հետ զրույցները ցույց են տալիս, որ նրանց մեծ մասն այնուամենայնիվ չեն գիտակցում մազահեռացման պատմական ու ազգային առանձնահատկությունները, ինչպես նաև այս միջամտության հնարավոր հեռակա բարդությունները:
Այն թյուր կարծիքը, որը հաճախ հանդիպում է ինտերնետային կայքերում, մազի՝ վարակի համար նպաստավոր միջավայր և աղբյուր հանդիսանալու վերաբերյալ, պետք է հերքեմ՝ փաստելով, որ իրականում մեծ նշանակություն ունի ինտիմ հիգիենայի տարրական պահպանումը: Ավելին, մազածածկույթը ևս իր դերն ու նշանակությունն ունի:
Ինտիմ զոնայի մաշկը շատ նուրբ է և ցանկացած ազդակ թողնում է որևէ հետևանք՝ ջերմային, տրավմատիկ, ճարագայթային:
Չափազանց կարևոր դիտարկում՝ գրեթե ոչ մի կին մինչև էպիլյացիայի միջոց ընտրելը չի խորհրդակցում մասնագետի հետ, չի անցնում նախնական հետազոտություն: Կանայք մոռանում են կամ անտեսում այն փաստը, որ իրենք միջամտություն են իրականացնելու մի հատվածում, որն օժտված է անընդհատ տարբեր բնույթի արտադրություն ունենալու հատկությամբ, չեն բացառվում վիրուսային ախտահարումները, մաշկային խնդիրները:
Հիմնականում անտեսվում է մազահեռացման եղանակի ճիշտ ընտրության կարևորությունը, ինչպես նաև այն փաստը, թե երբ է կարելի անել նման պրոցեդուրան: Ու առավել ևս՝ ինչպես նախապատրաստվել:
Հիմնականում կանայք և աղջիկները դիմում են բժիշկի երբ արդեն առկա են այնպիսի գանգատներ ինչպիսիք են քորը, մրմռոցը, առկա է ցանավորում, արտադրություն արտաքին սեռական օրգաններից, մաշկի գույնի և էլաստիկության փոփոխություն:
Բոլոր գանգատները հեռակա են, առաջին մազահեռացման սեանսից հետո նման բան չի նկատվում և պացիենտը հաճախ կապ չի տեսնում մազահեռացման միջամտության ու գանգատի միջև:
Այն մաշկային փոփոխությունները և պաթոլոգիաները որոնք հանդիպում էին հիմնականում կլիմակտերիկ շրջանի կանանց մոտ, այսօր ախտորոշվում են երիտասարդ ռեպրոդուկտիվ տարիքի կանանց մոտ:
Բարդություններից խուսափելու լավագույն միջոցը մազահեռացման պրոցեդուրա իրականացնելուց առաջ գինեկոլոգի խորհրդատվությունն է: Միայն այսսպիսով է հնարավոր կանխարգելել բարդությունները: Խորհուրդ կտրվի, թե որ ժամանակահատվածում է ճիշտ իրականացնել պրոցեդուրան, ինչպես պատրաստվել ու ամենակարևորը՝ ո՞ր տարբերակն ընտրել: Հակառակ պարագայում բարդություններն անխուսափելի են:
Տաթևիկ Ղորուխչյան
գինեկոլոգ, սոնոգրաֆիստ, բժշկական գիտությունների թեկնածու
Նյութը՝ healthmag.am