Սահմանամերձ համայնքները` ուշադրության կենտրոնում
Դեռևս 2017թ. սեպտեմբերից առողջապահության նախարարությունը նախաձեռնել է սահմանամերձ համայնքների բնակչությանը խորհրդատվություն և բուժօգնություն ցուցաբերելու ծրագիրը։
Կարևորելով սահմանամերձ համայնքների բնակչության առողջության պահպանումը` նախարարությունը, համագործակցելով մարզպետարանների և մայրաքաղաքի տարբեր բժշկական կազմակերպությունների հետ, շարունակում է կազմակերպել նման այցերը։
Սահմանամերձ համայնքների բնակչությանն իրենց բնակավայրերում երկրի առաջատար մասնագետների կողմից ցուցաբերվող բժշկական օգնության որակի բարելավման, բուժման շարունակականության ապահովման և մասնագիտացված բժշկական օգնության հասանելիության բարձրացման նպատակով նախատեսված աշխատանքները համակարգվել են ՀՀ առողջապահության նախարարի 2018 թվականի հունվարի 24-ի «Հայաստանի հանրապետության մի շարք սահմանամերձ համայնքների բնակչության բժշկական օգնությունը և սպասարկումը կազմակերպելու մասին» թիվ 162-Ա հրամանով։ Վերջինիս համաձայն Արարատի, Վայոց ձորի, Տավուշի և Գեղարքունիքի մարզպետարաններ են ուղարկվել «Սուրբ Գրիգոր Լուսավորիչ», «Էրեբունի», «Սուրբ Աստվածամայր» բժշկական կենտրոնների, Մ.Հերացու անվան ԵրՊԲՀ «Հերացի» թիվ 1 հիվանդանոցային համալիրի և «Մուրացան» համալսարանական կլինիկաների բժիշկ մասնագետների խմբերի 2018 թվականի այցելությունների ժամանակացույցները։ Մարզպետարաններին առաջարկվել է ցուցաբերել կազմակերպչական աջակցություն` նախապես իրազեկել սահմանամերձ համայնքների բնակչությանը, կազմակերպել խորհրդատվության կարիք ունեցողների ընդգրկումը ծրագրում:
2018 թվականին նախատեսվում են բժիշկ մասնագետների խմբերի առնվազն երկու այցելություն Արարատի, Վայոց ձորի, Տավուշի և Գեղարքունիքի մարզերի սահմանամերձ համայնքներ:
Մասնագիտական խմբերը այդ համայնքների բնակչությանը կտրամադրեն մասնագիտական խորհրդատվություն, կիրականացնեն հետազոտություններ և, ըստ անհրաժեշտության, ստացիոնար բժշկական օգնության կարիք ունեցողների բուժումը կկազմակերպեն մարզային կամ Երևանի մասնագիտացված հիվանդանոցներում:
