Friday, March 29, 2024
Նորություններ

Առողջական ինչ խնդիրների դեպքում են օգնում տարբեր կենդանիները

Վաղուց հայտնի է, որ կենդանիները դրական ազդեցություն են ունենում ոչ միայն մարդու տրամադրության, այլև ինքնազգացողության վրա, քանի որ կարող են բուժել այս կամ այն հիվանդությունը: Այժմ այս տեսությունն իր գիտական բացատրությունն է ստացել, քանի որ մի խումբ գիտնականներ որոշել են պարզել, թե ինչպես են կենդանիներն ազդում մարդու վրա:

Գիտնականների միջազգային խումբն ուսումնասիրության համար առանձնացրել է հինգ կենդանի և փորձել պարզել, թե որ խնդիրների դեպքում որ կենդանին է օգնում: Հետազոտությունների արդյունքում պարզվել է, որ շները, կատուները, ձիերը, մեղուներն ու օձերն իսկապես օժտված են որոշակի բուժիչ հատկություններով: Ընդ որում՝ նրանցից յուրաքանչյուրն ունի միայն իրեն բնորոշ առանձնահատկություններ:

Ուսումնասիրությունները ցույց են տվել, որ ձիերն օգնում են հենաշարժիչ համակարգի հիվանդությունների դեպքում, ինչպես նաև հանգստացնում են և անգամ օգնում են ազատվել թմրանյութային ու ալկոհոլային կախվածությունից:

Շներն օգնում են ազատվել ընկճախտից և ամրապնդում են սրտանոթային համակարգը: Բացի այդ, շունը կօգնի հստակ ախտորոշել չարորակ ուռուցքների ի հայտ գալն ու զարգացումը, ինչպես նաև կնպաստի հիվանդություններից հետո օրգանիզմի արագ վերականգնմանը:

Ինչպես շները, կատուները ևս հիանալի օգնական են դեպրեսիայի դեմ պայքարում: Նրանք նաև արդյունավետ կերպով ազատում են նևրոզներից և օգնում են ախտորոշել բորբոքումները, քանի որ վաղուց հայտնի է, որ կատուները միշտ պառկում են հիվանդ տիրոջ մարմնի այն հատվածին, որտեղ որևէ խնդիր կա: Բացի այդ, կատուները բավական բարձր հավանականությամբ կանխատեսում են եղանակը:

Ոչ պակաս կարևոր են մարդկության համար նաև մեղուներն ու օձերը: Մեղուները մեղր, ակնամոմ, ծաղկափոշի ու մեղվակաթ են արտադրում, որոնք օգտագործվում են ոչ միայն բժշկության մեջ, այլև կոսմետոլոգիայում, իսկ օձերի թույնը կիրառվում է տարատեսակ քսուքների ու գելերի բաղադրության մեջ, քանի որ շատ արդյունավետ է հոդերի ու անոթների բուժման համար:

Նյութի աղբյուրը՝ med.tert.am

Leave a Reply

x Close

Like Us On Facebook