Կիտրոնով ջրի օգտակար հատկությունները
Օրվա ընթացքում բավարար քանակությամբ ջրի գործածությունը շատ կարևոր է առողջության համար, քանի որ ջուրը մարդու օրգանիզմի համար կենսական նշանակություն ունեցող հեղուկ է։ Բավարար քանակությամբ ջուր խմելը թույլ կտա բարելավել օրգանիզմի աշխատանքն ու ձեռք բերել առողջ, թարմ ու գեղեցիկ մաշկ։ Ջուրը կօգնի կարգավորել աղիների և օրգանիզմի այլ համակարգերի աշխատանքն ու բարենպաստ ազդեցություն կունենա ամբողջ օրգանիզմի վրա, սակայն հասարակ ջրին մի փոքր կիտրոնի հյութ ավելացնելը կօգնի հասնել էլ ավելի լավ արդյունքի։
Շատերը կիտրոնով ջուրն օգտագործում են ավելորդ կիլոգրամների դեմ պայքարի համար, սակայն քաշի նվազեցումն այս առողջարար ըմպելիքի միակ օգտակար հատկությունը չէ։ Մասնագետները ներկայացրել են վեց պատճառ ամեն օր կիտրոնով ջուր խմելու համար։
Ամրապնդում է իմունային համակարգը
Կիտրոնը պարունակում է վիտամին С, որն օգնում է զգալիորեն ամրապնդել իմունային համակարգն ու խթանել դրա ակտիվ աշխատանքը։ Կիտրոնով ջուր խմելը կօգնի կանխել առողջական մի շարք խնդիրների զարգացումը։ Իր հակաբակտերիալ ազդեցության շնորհիվ այն կօգնի պայքարել տարբեր վարակների դեմ և կմեղմի կոկորդի ցավը։ Ավելին՝ այս ըմպելիքը թույկ կտա արագացնել նաև վերքերի ապաքինումը։
Մաքրում է մաշկը
Այս ըմպելիքն օժտված է յուրահատուկ հատկություններով, որոնց շնորհիվ բարելավում է մաշկի վիճակը։ Այն օգնում է մաքրել մաշկն ու հակասեպտիկ ազդեցություն է ունենում, ինչի շնորհիվ ազատում է բշտիկներից, այրվածքներից ու էկզեմայից։ Բացի այդ, պարբերաբար կիտրոնի հյութով ջուր խմելը նպաստում է մաշկի ծերացման գործընթացի դանդաղեցմանը։
Ազատում է մարսողական խնդիրներից
Մարսողական որոշակի խնդիրներից կարելի է հեշտությամբ ազատվել շատ պարզ ու հասանելի միջոցով՝ կիտրոնով ջուր խմելով։ Այս ըմպելիքն ազատում է ստամոքսի այրոցից, սրտխառնոցից ու փորափքանքից։ Բացի այդ, սննդի չարաշահման դեպքում կես կիտրոնի հյութով մի բաժակ ջուր խմելը կօգնի շատ արագ ազատվել ստամոքսում ծանրության զգացողությունից։
Օգնում է ազատվել ավելորդ կիլոգրամներից
Սա այս ընպելիքի ամենահայտնի օգտակար հատկություններից է, ուստի այն նույնպես չի կարելի անտեսել։ Կիտրոնով ջուրն իսկապես օգնում է ազատվել ավելորդ քաշից, քանի որ մաքրում է օրգանիզմը շլակներից ու տոքսիններից։ Բացի այդ, այն հիանալի միջոց է ծարավը հագեցնելու և ախորժակը վերահսկողության տակ պահելու համար։ Շատ հաճախ երեկոյան ժամերին որևէ բան ուտելու ցանկություն է լինում, սակայն օրգանիզմն ավելորդ սննդով ծանրաբեռնելու փոխարեն կիտրոնով ջուր խմելը կօգնի ոչ միայն ազատվել քաղցի զգացումից, այլև խթանել քաշի նվազման գործընթացը։
Կարգավորում է զարկերակային ճնշման ցուցանիշները
Ցիտրուսային այս մրգով ջուրն օգնում է կարգավորել արյան ճնշումն ու մաքրում է արյունը։ Կիտրոնը հարուստ է կալիումով, ինչի շնորգիվ այս ըմպելիքը վերածվում է սրտանոթային հիվանդությունների դեմ պայքարի արդյունավետ միջոցի։ Բացի այդ, այն օգնում է ազատվել նաև սրտխառնոցից ու գլխապտույտից։
Հանգստացնող ազդեցություն է ունենում
Կիտրոնի հյութով ջուրը հանգստացնող ազդեցություն է ունենում նյարդային համակարգի վրա, ինչպես նաև նվազեցնում է դեպրեսիայի դրսևորումներն ու օգնում է ազատվել հոգեբանական սթրեսից։
Նյութի աղբյուրը՝ medikforum.ru
