Համեղ ու օգտակար վիտամինային ըմպելիք համավարակի պայմաններում իմունային համակարգն ամրապնդելու համար
Բավարար քանակությամբ վիտամիններ ու հանքանյութեր ստանալու համար մասնագետները խորհուրդ են տալիս հագեցնել սննդակարգը մրգերով, բանջարեղենով և այլ օգտակար մթերքով, սակայն այս կարևոր տարրերը մեծ չափաբաժնով ստանալու համար կարելի է նաև պատրաստել մի համեղ ու օգտակար վիտամինային սմուզի, որը կօգնի հեշտությամբ ամրապնդել իմունային համակարգը։
Ինչպես գրում է Inmyroom պորտալը, այս կանաչ սմուզիի պարտաստման համար հարկավոր է մի մեծ բուռ սպանախ, մոտ 2 սմ երկարությամբ կոճապղպեղի արմատ, 5-6 հատ արմավ, 2 նարինջ, ½ կիտրոն և ¼ թեյի գդալ աղացած քրքում։
Ըմպելիքը պատրաստելու համար նախ հարկավոր է քամել ցիտրուսային մրգերի հյութը, մաքրել կոճապղպեղի արմատն ու հեռացնել արմավների կորիզները, այնուհետև լցնել բոլոր բաղադրիչները կոտորակիչի մեջ ու լավ հարել մինչև ստացվի համասեռ զանգված։ Ստացված վիտամինային ըմպելիքը խորհուրդ է տրվում խմել պատրաստ լինելուն պես, այլապես այն կարող է կորցնել իր օգտակար հատկությունները։
Նյութը՝ med.tert.am