Նեապոլի Նուովո ամրոցը կամ սպիտակ մարմարե հաղթական կամարը
Նուովո ամրոցը (Նոր ամրոց, իտալ.՝ Castel Nuovo), 1279 թվականին կառուցված, Նեապոլի կենտրոնում գտնվող միջնադարյան ամրոց է և հանդիսանում է քաղաքի ճարտարապետական գլխավոր կոթողներից մեկը :
Մինչև 1266 թվականին Կառլ I Անժուացու գահին տիրելը՝ Նեապոլի թագավորության մայրաքաղաքը Պալերմոն էր: Կապուայի ամրոցը համարվում էր Նեապոլի թագավորական նստավայր: Երբ մայրաքաղաքը տեղափոխվեց Նեապոլ, Կառլը հրամայեց պալատի համար կառուցել ծովից ոչ հեռու գտնվող նոր ամրոց: Ֆրանսիացի ճարտարապետների ղեկավարությամբ շինարարական աշխատանքներն սկսվեցին 1279 թվականին և ավարտվեցին երեք տարի անց:
Միակողմանի սպիտակ մարմարե հաղթակամարը կառուցվել է 1470 թվականին՝ 1443 թվականին Ալֆոնսո Արագոնացու Նեապոլ մտնելու առթիվ: Այն գտնվում է ամրոցի արևմտյան երկու աշտարակների միջև: Հաղթակամարի դիզայնի հեղինակն է միլանցի ճարտարապետ Պիետրո դի Մարտինան: Ժամանակակից հեղինակներն այն վերագրում են Ֆրանչեսկո Լաուրանային:
Կամարն ունի 35 մետր բարձրություն և խոյանում է երկու կամարների միջև:
Մուտքի երկու կողմերում կորինթոսյան սյուներն են, առաջին մակարդակում քանդակված է Ալֆոնսոյի քառաձի մարտակառքը: Կենտրոնում Արագոնի խորհրդանշով պատկերված է վահան: Ներքևի ֆրիզի վրա գրված է. ALFONSVS REX HISPANVS SICULVS ITALICUS PIVS CLEMENS INVICTUS վերևի ֆրիզին գրված է՝ ALFONSVS REGUM PRINCEPS HANC CONDIDIT ARCEM
Վերևի երկրորդ կամարը շրջապատված է առյուծներով և չորս որմնախորշերով, որտեղ կան Ալֆոնսոյի արժանիքները պատկերող արձաններ, որոնց վերևում կամարաձև ճակատաքարն է։ Հաղթակամարի գագաթին Ալֆոնսոյի արձանն է:
Կամարն անցնելով՝ մտնում ենք բրոնզե դարպասներով հրապարակ: