187 views

Հայաստանում 60-ից ավելի բարձր տարիքային խմբի բնակչությունն ավելի շատ է, քան 5 տարեկանները, ինչը մտահոգիչ է, քանի որ 60-ից ավելի բարձր տարիքային խմբին, գլոբալ առումով, պահողներ են պետք՝ ապահովելով նրանց սոցիալական և տնտեսական անվտանգության երաշխիքները: aroxjblog.am-ի հաղորդմամբ՝ այս մասին «Հայաստանում ժողովրդագրական իրավիճակի բարելավման առողջապահական ասպեկտները» թեմայով համաժողովին նշեց Երևանի պետական բժշկական համալսարանի ռեկտոր Արմեն Մուրադյանը: «Ժողովրդագրական ցուցանիշները հանդիսանում են կարևորագույն անվտանգության երաշխիքը յուրաքանչյուր երկրի ժողովրդի և պետականության համար: Մասնագետները քննարկելու են հիմնական ցուցանիշները, որոնք ազդում են ժողովրդագրական տվյալների վրա, մասնավորապես, ծնելությունն ու մահացությունը, միգրացիոն պրոցեսները, և փորձելու են մասնագիտական կարծիքները ձևավորել վերարտադրողական նոր սարքավորումների ու դրանց մատչելիության վերաբերյալ»,- ասաց Մուրադյանը: Ռեկտորը ընդգծեց՝ կարևոր է, որ յուրաքանչյուր ընտանիքում 3 և ավել երեխա ծնվի: Նրա համոզմամբ՝ սա Հայաստանի համար խիստ կարևոր է: «Վերջին տարիներին նկատվում է, որ ընտանիքում երրորդ երեխայի ծնելիության դեպքերն ավելացել են: Ցուցանիշներն այդ մասին են խոսում, բայց, այնուամենայնիվ, պարզ վերարտադրողականության համար ամեն զույգ 3 երեխա պետք է ունենա»,- ասաց նա: Երևանի պետական բժշկական համալսարանի կլինիկական աշխատանքների կազմակերպման վարչության պետ Դավիթ Մելիք-Նուբարյանը նշեց, որ ԵՊԲՀ-ն, գիտակցելով խնդրի կարևորությունը, գնահատելով այն մեծ աշխատանքները, որոնք իրականացվում են պետական կառավարման մարմինների կողմից ժողովրդագրական իրավիճակի բարելավման ուղղությամբ, համաժողովի կազմակերպման անհրաժեշտություն է տեսել: «Նպատակ ունենք մեր աջակցությունը ցուցաբերել, քանի որ ցանկացած ծրագիր իր հերթին պահանջում է գիտական հենք, և մեր համալսարանը, ունենալով այդ հարուստ փորձը, պատրաստ է այդ հենքը ներդնել գործի մեջ: Ուզում ենք, որ խնդրի մասին ևս մեկ անգամ բարձրաձայնվի, որպեսզի ժողովրդագրական իրավիճակի փոփոխությունը, բնակչության ու երեխաների թվի աճը լինի համազգային գաղափարախոսության կարևորագույն բաղադրիչներից մեկը, և յուրաքանչյուրը փորձի գիտակցել, որ սա իրոք անհրաժեշտ է»,- ասաց նա: Դավիթ Մելիք-Նուբարյանը ընդգծեց՝ պետք է փաստել, որ առողջապահությունն ավելի համեստ դերակատարում ունի ժողովրդագրական իրավիճակի բարելավման գործում: Առողջապահական համակարգը կարող է ներդրում ունենալ մահացությունը կրճատելով, ծնելիության գործընթացի վրա ազդելով: Եզրափակելով խոսքը՝ Դավիթ Մելիք-Նուբարյանը նշեց՝ ժողովրդագրության վիճակի վատթարացումը էապես ազդում է նաև առողջապահության համակարգի վրա, և դրանից անմասն մնալ ու չխոսել թեմայի շուրջ, հնարավոր չէ: