63 views

Ինչպես հայտնի է՝ սննդակարգի և սեռական կյանքի միջև անմիջական կապ կա, ավելին՝ սննդամթերքի տեսակից կախված է սեռական և վերարտադրողական կյանքի որակը: «Միքայելյան» համալսարանական հիվանդանոցի սեքսոպաթոլոգիայի կլինիկայի ղեկավար, ԵՊԲՀ սեքսոլոգիայի ամբիոնի վարիչ, բ.գ.թ., դոցենտ Վրեժ Շահրամանյանը վստահեցնում է, թե ի՞նչ, ինչքա՞ն և ինչպե՞ս ես ուտում, ուղղակիորեն ազդում է սեռական առողջության վրա: Պատահական չէ, որ որոշ սննդատեսակներ հասարակությունը կապում է առողջ սեռական կյանք ունենալու հետ: Ներկայացնում ենք բժիշկ-սեքսոպաթոլոգ Վրեժ Շահրամանյանի խորհուրդները, թե ինչ է պետք անել առողջ սերունդ և որակյալ սեռական կյանք ունենալու համար: Սեռական առողջության համար կարևոր նշանակություն ունի ֆոսֆորով հարուստ մթերքը, հատկապես ձուկը։ Դեռ հին հռոմեացիներն ասում էին, որ ձուկը սնում է ցանկասիրությունը: Այդ ձկներից են` կատվաձուկը, կաղամարը, ոստրեն, ինչպես նաև մեր հանրահայտ իշխանը: Խթանիչ ներգործություն ունեն նաև մրգերը (նուռ, անանաս) և բանջարեղենը (ծաղկակաղամբ, գազար)։ Մեղրը ընկույզը, նուշը և պիստակը պարունակում են վիտամինների և միկրոտարրերի բացառիկ քանակ, ինչի շնորհիվ էլ խթանում են սեռական ցանկությունը։ Սեռական կարողությանը դրական են ազդում ծովամթերքը, միսը և սունկը: Ցանկալի է, որ մսեղենը լինի ոչ թե տապակած, այլ շոգեխաշած։ Բացասաբար են ազդում կոֆեին պարունակող ըմպելիքները` գազավորված հյութերը, սուրճը, ինչպես նաև ֆաստ-ֆուդը, խոլեստերինի բարձր քանակ պարունակող ուտելիքները, ծխախոտը։ Շատերը, հատկապես երիտասարդները այն թյուր կարծիքի են, թե ալկոհոլը, իբր, խթանում է սեռական ցանկությունը և ուժեղացնում պոտենցիան: Սեքսոպաթոլոգները այս տեսակետի հետ կտրականապես համաձայն չեն: Հարբեցողությունը «ստիպում» է մեր լյարդին արտադրել հսկայական քանակությամբ ֆերմենտներ, որոնք քայքայում են տեստոստերոնը` տղամարդու լիբիդոյի (սեռական ցանկության) հորմոնը: Ժամանակակից հետազոտությունները պարզել են, որ հարբեցողությունը կարող է հանգեցնել սեռական անկարողության և անպտղության: Խորհուրդ չի տրվում սեռական հարաբերությունից առաջ կուշտ փորով հաց ուտել, թեեւ շատ քաղցած լինելն էլ սխալ է: Հարաբերությունից առաջ խորհուրդ է տրվում թեթեւ սնունդ ընդունել: Առաջին հերթին ընդունած սնունդը պետք է լինի լիարժեք, այսինքն՝ ածխաջրերով ու սպիտակուցներով հարուստ: Երկրորդը՝ գոյություն ունի հատուկ սննդակարգ, որը խթանում է սեռական ֆունկցիան: Վրեժ Շահրամանյանը հիշեցնում է՝ առողջ սերունդ և որակյալ սեռական կյանք ունենալու համար ցանկալի է սննդակարդում ընդգրկել կաթնաշոռ, մեղր, ձու, ձուկ, հավի, տավարի միս: Հատկանշական է, որ վերոնշյալ սնունդը ցանկալի է ընդունել զատ-զատ և առանց հեղուկների հետ խառնելու, ինչպես սովորաբար մենք անում ենք: