Արցախցի 6 ամսական Ռուբինան է, ով կարողացել է հաղթահարել ոչ միայն առողջական բարդ խնդիրը, այլ նաև վիրահատությունը

«Շենգավիթ» բկ նորածնային և մանկական վիրաբուժության բաժանմունքի ղեկավար

Մանկական վիրաբույժ, մանկական ուրոլոգ Աշոտ Հովսեփյանի գրկում ժպտացող հրաշքը արցախցի 6 ամսական Ռուբինան է՝ մեր փոքրիկ հերոսներից, ով կարողացել է հաղթահարել ոչ միայն առողջական բարդ խնդիրը, այլ նաև վիրահատությունը

Երեխայի մոտ ներարգանդային կյանքում հայտնաբերվել էր աջ երիկամի բաժակավազանային համակարգի լայնացում:

Ծնվելուց հետո՝ Արցախում ուլտրաձայնային հետազոտությամբ, հաստատվել էր աջ երիկամից մեզի արտահոսքի խանգարում:

Ռուբինայի ծնողները դիմել էին «Շենգավիթ» ԲԿ նորածնային և մանկական վիրաբուժության բաժանմունք, այստեղ իրականացվել է ուրոդինամիկ համալիր հետազոտություն և վերջնական ախտորոշվել է՝ աջ երիկամի լրիվ երկատում, երկատված վերին հատվածի էկտոպիկ միզածորանի օբստրուկտիվ մեգաուրետոր:

Այսինքն՝ վերին կեսի միզածորանը միզապարկին միանում էր ոչ տիպիկ տեղում և վերջինիս բացվածքը խիստ նեղածաց էր, որի հետևանքով մեզի արտահոսքը վերին կեսից խանգարված էր:

Դա հանգեցրել էր երիկամի վերին կեսի և միզածորանի լայնացումների և ախտահարման:

Աշոտ Հովսեփյանի կողմից իրականացվել է երկատված երիկամի ավազանների և միզածորանների ռեկոնստրուկտիվ վիրահատություն՝ լապարոսկոպիկ եղանակով:

Նույն եղանակով էկտոպիկ միզածորանը անջատվել, մոբիլիզացվել և մասնահատվել է և բերանակցվել երկատված երիկամի ստորին կեսի ավազանի հետ:

Երեխայի երիկամի երկու հատվածներից մեզի ադեկվատ արտահոսքը վերականգնվել է

Հետվիրահատական շրջանը անցել է հարթ, երեխան իրեն հրաշալի է զգում և պատրաստվում է դուրսգրման:

Նման վիրահատությունները կարևոր են ոչ միայն առողջության նկատառումներից ելնելով, այլեւ կյանքի որակը լավացնելու նպատակով:

Հ.գ. Լուսանակարը հրապարակված է ծնողի թույլտվությամբ։