Ինչպես ազատվել կոպերի այտուցներից. ամենապարզ ու արդյունավետ միջոցները

Աչքերի տակ առաջացած «պարկերը» կարող են տհաճ անակնկալ դառնալ յուրաքանչյուրի համար, ուստի զարմանալի չէ, որ մարդիկ փորձում են հնարավորինս արագ ազատվել դրանցից: Նման այտուցներից ազատվելու ամենապարզ միջոցը սառույցի կտորներով մերսումն է, սակայն լինում են դեպքեր, երբ անգամ այս մեթոդը բավական արդյունավետ չի լինում և մարդիկ ստիպված են լինում գտնել այլընտրանքային լուծումներ:

Եթե սովորական սառույցով մերսումը չի օգնում ազատվել այտուցներից, կարելի է կիրառել սառեցրած թուրմեր, ինչպես նաև թուրմերով թրջոցներ և օգտակար դիմակներ: Aif.ru կայքը ներկայացրել է այս խնդրի դեմ պայքարի ամենաարդյունավետ միջոցները, որոնք կօգնեն ազատվել աչքերի տակ առաջացած «պարկերից» և միշտ անթերի տեսք ունենալ:

1 ճաշի գդալ տերեփուկի ծաղիկներին ավելացնել մի բաժակ եռման ջուր, թրմել մինչև հեղուկը սառչի, այնուհետև քամել, լցնել սառույցի կաղապարների մեջ և սառեցնել: Սառած թուրմի կտորներն օգտագործել այտուցված կոպերը մերսելու համար:

1 ճաշի գդալ անանուխի մանրացրած տերևներին ավելացնել մի բաժակ եռման ջուր, թրմել, այնուհետև քամել, լցնել սառույցի կաղապարների մեջ և սառեցնել: Սառած թուրմի կտորներն օգտագործել այտուցված կոպերը մերսելու համար:

1 ճաշի գդալ կեչու չորացրած տերևներին ավելացնել մի բաժակ եռման ջուր, թրմել կես ժամ, այնուհետև քամել: Բամբակյա սկավառակները թրջել ստացված թուրմով, դնել կոպերին և թողնել 20 րոպե:

Քաղցր խնձորը քերիչով մանրացնել, ավելացնել մի գդալ ցածր յուղայնությամբ թթվասեր և լավ խառնել: Դիմակը հաստ շերտով քսել ստորին կոպերին և թողնել 15 րոպե:

Նյութը՝ med.tert.am