Կրծքագեղձի ինքնազննում

Կրծքագեղձի ընդհանուր տեսքը։ Կանգնել հայելու դիմաց` ձեռքերը ազատ կախված վիճակում։ ՈՒշադիր նայել հայելու մեջ յուրաքանչյուր գեղձին` ստուգելով, թե՞ չկա արդյոք գեղձի չափերի, ձևի, սահմանների փոփոխություն։ՈՒշադրություն դարձնել գեղձի համաչափությանը։

Մաշկի վիճակը, դրա առաձգականությունը, գույնի փոփոխումը, կարմրության առկայությունը ամբողջ գեղձում կամ սահմանափակ հատվածներում։ Կարևոր է ստուգել նաև` չկա՞ արդյոք մաշկի պնդացում, այտուցվածություն, փոսություն, ձգվածություն, խոցոտում, կնճռոտում։

Շոշափում կանգնած դիրքում։ Շոշափումը կատարում են անրակից մինչև կողի ստորին եզրը, կրծոսկրից դեպի անութային շրջան, որտեղ կարող են հայտնաբերվել մեծացած ավշային հանգույցները։

Շոշափում պառկած դիրքում։ Սա ինքնաստուգման ամենակարևոր մասն է։
Գեղձը շոշափվում է 2 մեթոդով`
1) քառակուսու, երբ կաթնագեղձը մտովի բաժանում են քառակուսիների, ամեն քառակուսին շոշափվում է առանձին-առանձին վերից վար
2) պարույրի, երբ պարուրաձև շարժումներով շոշափվում է գեղձը, անութային շրջանից դեպի պտուկ ։

Պտուկի հետազոտություն։ Ստուգվում է` չկա՞ արդյոք պտուկի ձևի, գույնի փոփոխություն, ներհրվածություն, խոցոտում, ճաք։ Պարտադիր է նաև շոշափել պտուկը և հարպտկային շրջանը։