Մանրէներից պաշտպանվելու վեց տարածված հնարք, որոնք իրականում անարդյունավետ են

Շատերը կարծում են, որ հատակին ընկած սնունդը հինգ վայրկյանի ընթացքում վերցնելու դեպքում այն կարելի է ուտել, քանի որ այդ ընթացքում միկրոօրգանիզմները պարզապես չեն հասցնի կպչել այդ մթերքին։ Սակայն իրականում հետազոտությունները ցույց են տվել, որ մանրէները սննդամթերքի վրա կհայտնվեն անգամ մեկ վայրկյանում։ Ընդ որում՝ որքան երկար է մթերքը մնացել հատակին, այնքան շատ վնասակար տարրեր է այն կուտակել։ Սա է պատճառը, որ նման դեպքերում հարկավոր է դեն նետել հատակին հայտնված մթերքը կամ անպայման լվանալ այն մինչ ուտելը։

Դռան բռնակին դիպչել միայն հագուստի թեզանիքով

Այս հնարքը կիրառվում է մաշկի և աղտոտված մակերևույթի միջև պատնեշ ստեղծելու համար, ինչը շատ ճիշտ է, սակայն այդ նպատակով հագուստը կիրառելը լավագույն տարբերակը չէ, քանի որ դռան բռնակին եղած կեղտը, բակտերիաներն ու վիրուսները հայտնվում են հագուստի վրա, որից հետո կարող են հեշտությամբ հայտնվել նաև մարդու ձեռքերին, դեմքին, մազերին, հեռախոսին կամ պայուսակին։ Նման դեպքերում հարկավոր է օգտագործել որևէ բան, որը կարելի է անմիջապես դեն նետել (օրինակ ՝ անձեռոցիկ)։ Ընդ որում՝ անձեռոցիկը պետք է ծալված լինի մի քանի շերտով, քանի որ հակառակ դեպքում վնասակար տարրերը պարզապես կներծծվեն դրա մեջ և կախտահարեն մաշկը։ Ավելին՝ հանրային վայրերում որևէ բանին դիպչելուց հետո այնուամենայնիվ հարկավոր է լվանալ ձեռքերն օճառով ու հոսող ջրով։

Վերելակի կոճակերը սեղմել արմունկով կամ մատնոսկրով

Այս դեպքում ևս մարդկանց թվում է, թե իրենք ոչնչին չեն դիպչել, մինչդեռ արմունկին հայտնված մանրէները կարող են հեշտությամբ հայտնվել անձնական օգտագործման իրերին ու սեղաններին, որտեղից էլ՝ ձեռքերին ու դեմքին։ Շատերը նման դեպքերում գերադասում են սեղմել կոճակը մատնոսկրով, սակայն այս սովորությունն էլ ավելի վնասակար է, քանի որ ձեռքերին հայտնված մանրէները կարող են շատ արագ հատնվել օրգանիզմում։

Նման խնդիրներից խուսափելու համար այս դեպքում ևս խորհուրդ է տրվում կիրառել անձեռոցիկ։ Հակառակ դեպքում կարելի է սեղմել կոճակը մատներով, սակայն տուն կամ աշխատավայր մտնելուն պես անհապաղ լվացվել։

Պահել շնչառությունը, եթե մոտակայքում որևէ մեկը հազում է կամ փռշտում

Եթե հազացող կամ փռշտացող անձը հիվանդ է, ապա շնչառությունը պահելը չի պաշտպանի վարակումից։ Բանն այն է, որ մարդը պարզապես չի կարող այդքան արագ կողմնորոշվել ու պահել շնչառությունը, ուստի թքի և խորխի մանրագույն կաթիլներն այնուամենայնիվ կհայտնվեն շնչուղիներում։ Բացի այդ, քիթն ու շնչառական համակարգը վարակի ներթափանցման միակ ճանապարհը չեն, քանի որ այն կարող է ախտահարել օրգանիզմը նաև աչքերի կամ բերանի միջոցով։ Սա է պատճառը, որ վարակման հավանականությունը նվազեցնելու համար հարկավոր է անպայման  դիմակ կրել և միմյանցից 1,5–2 մետր հեռավորություն պահել։

Բոլոր մակերևույթները պարբերաբար մաքրել հակաբակտերիալ անձեռոցիկներով

Այս հնարքը կարող է արդյունավետ լինել միայն յուրաքանչյուր մակերևույթի համար նոր անձեռոցիկ կիրառելու դեպքում, սակայն միևնույն անձեռոցիկը սեղանը, դռների բռնակները, լույսի անջատիչներն ու այլ մակերևույթները մաքրելու համար կիրառելը որևէ օգուտ չի տա։ Բանն այն է, որ որքան երկար է կիրառվում անձեռոցիկն, այնքան քիչ հակաբակտերիալ նյութ է դրա վրա մնում, ինչը նշանակում է, որ մանրէները չեն ոչնչացվում և կարող են անգամ տարածվել։

Ձեռքերը հաճախ մշակել հակասեպտիկ նյութով

Շատերը կարծում են, որ հակասեպտիկ ախտահանիչ նյութերն ապահովում են լիարժեք պաշտպանություն, ուստի դրանցով ձեռքերը մշակելու և տարածքն ախտահանելու դեպքում կարելի է այլևս չանհանգստանալ, սակայն հարկ է հիշել, որ հակասեպտիկ միջոցներն արդյունավետ են լինում միայն ճիշտ գործածության դեպքում։

Այս ախտահանող նյութերը չեն կարող փոխարինել ջրին, օճառին ու մաքրող միջոցներին, իսկ կեղտոտ մակերևույթին քսելու դեպքում դրանց արդյունավետությունը նվազում է։ Միևնույն ժամանակ մարդը վստահ է լինում, որ ոչնչացրել է բոլոր ախտածին տարրերն ու կարող է դիպչել դեմքին, աչքերին ու բերանին, ինչը բարձրացնում է վարակվելու հավանականությունը։

Նման խնդրից խուսափելու համար հարկավոր է նախ լվացվել կամ մաքրել մաշկը խոնավ անձեռոցիկով, որից հետո միայն կիրառել ախտահանող միջոցները։ Ընդ որում՝ չի կարելի նաև չարաշահել նման միջոցների գործածությունը, քանի որ այդ դեպքում ախտածին միկրոօրգանիզմները պարզապես կայունություն ձեռք կբերեն։

Նյութը ` med.tert.am