Այրվածքներ․ վնասակար միֆեր և առաջին օգնության ոսկե կանոնը

312 views

Այրվածքների դեպքում սխալ առաջին օգնությունը կարող է խորացնել վնասվածքը և բարդացնել հետագա բուժումը։

Տարածված սխալներ, որոնցից պետք է խուսափել

Երբեք մի՛ քսեք այրվածքին ձեթ, մածուն, ատամի մածուկ, սպիրտ կամ ձվի սպիտակուց։ Այս միջոցները կարող են գրգռել վնասված մաշկը, մեծացնել վարակի վտանգը և դժվարացնել բուժումը։

Առաջին օգնության ոսկե կանոնը՝ այրվածքը հովացրե՛ք հոսող զով ջրով։

Առաջին օգնության քայլերը

1. Հովացրե՛ք։ Դադարեցրեք այրող գործոնի ազդեցությունը և այրված հատվածը պահեք հոսող զով ջրի տակ 20 րոպե։ Մի՛ կիրառեք սառույց կամ չափազանց սառը ջուր։

2. Հեռացրե՛ք։ Զգուշորեն հեռացրեք զարդերը և մաշկին չկպած հագուստը՝ նախքան այտուցի առաջացումը։

3. Ծածկե՛ք։ Հովացնելուց հետո այրված հատվածը ազատ ծածկեք ստերիլ, չկպչող վիրակապով կամ սննդային թաղանթով՝ առանց սեղմելու։

Մի՛ ծակեք առաջացած բշտիկները և մի՛ կիրառեք տնային բուժման միջոցներ։

Ե՞րբ զանգահարել 103

Անհապաղ շտապօգնություն կանչե՛ք, եթե՝

Այրվածքը մեծ մակերես է ընդգրկում կամ խորն է։

Վնասվածքն առաջացել է էլեկտրական հոսանքից կամ քիմիական նյութից։

Առկա է շնչուղիների վնասման կասկած։

Տուժածի ընդհանուր վիճակը ծանր է կամ վատանում է։

Դեմքի, ձեռքերի, ոտքերի, սեռական օրգանների և հոդերի շրջանում այրվածքները, ինչպես նաև երեխաների և տարեցների այրվածքները պահանջում են բժշկական գնահատում։