83 views

Ապրիլին պատվաստանյութերի գծով ավելի քան 1000 փորձագետ, բժիշկ, գիտնական հավաքվել էր Վաշինգտոնում։ Նրանք չորս օրում ուսումնասիրում էին բոլոր առաջավոր հետազոտությունները, լուծում պատվաստանյութերի աշխարհի ամենահրատապ հարցերը, գրել է NBC News-ը։ Covid-19-ի դեմ պատվաստանյութերի մասին խոսակցություններն անխուսափելի էին։ Բայց Համաշխարհային կոնգրեսի օրակարգում մեկ այլ առեղծվածային հիվանդության դեմ պատվաստանյութն էր, հիվանդություն, որը կարող է խոցել ցանկացած պահի՝ «X հիվանդություն»։ «X հիվանդությունը» ինչ-որ կոնկրետ վիրուս, մանրէ կամ մեկ այլ միկրոբ չէ, այլ տերմին է, որն օգտագործվում է որպես այն պաթոգենի անվանում, որը Երկիր մոլորակը ճանկերի մեջ կառնի հաջորդ համավարակի ժամանակ։ Իսկ հաջորդ համավարակը իսկապես լինելու է, կարծում են փորձագետները։ Պատվաստանյութերի գծով փորձագետների համար պարզ է մի բան. անկախ այն բանից, թե ինչ ձեւ կընդունի «X հիվանդությունը», նրանք ստիպված են լինելու աշխատել եւ պատվաստանյութ ստեղծել։ Այս խնդիրը կարող է անհաղթահարելի թվալ՝ հաշվի առնելով անհայտների հսկայական քանակությունը։ Արդյո՞ք նրանք հիմա պետք է կենտրոնանան կոնկրետ վիրուսների վրա, որպեսզի առավելություն ստանան։ Արդյո՞ք պետք է ուշադրություն դարձնեն այն պաթոգեններին, որոնք առայժմ միայն կենդանիների մոտ են հանդիպում։ Մի հարց էլ է ծագում, որն ակնհայտ է դարձել ԱՄՆ-ում պատվաստման արշավն սկսելուց հետո. ինչպես՞ համոզել թերահավատ մարդկանց պատվաստվել։ Գիտնականները պատվաստանյութերին նվիրված Համաշխարհային կոնգրեսում ընդունել են, որ, չնայած իրենց պատրաստվածությանը, մի խնդիր ցավալիորեն մնում է անհաղթահարելի՝ աճող հակապատվաստումային շարժումը։ Եթե մարդիկ հրաժարվում են պատվաստանյութերից՝ շարունակվող համավարակին դեմ-հանդիման, ապա գալիք համավարակների դեպքում մենք դառնալու ենք զանգվածային մահերի վկաները, նախազգուշացրել է Ռոբերտ Վուդ Ջոնսոնի հիմնադրամի փոխնախագահ, բժիշկ Ջուլի Մորիտան։ Պատճառները, թե ինչու մարդիկ կարող են չցանկանալ կամ հրաժարվել պատվաստվելուց, բարդ են, գրել է Առողջապահության համաշխարհային կազմակերպությունը, եւ ներառում են մարդկանց անվրդովությունն ու պատվաստումների եւ առողջապահության ոլորտի ներկայացուցիչների հանդեպ անվստահությունը։ Գործակալության գնահատմամբ՝ աշխարհում պատվաստանյութերի ավելի լայն տարածման պարագայում կարելի կլիներ փրկել 1,5 մլն կյանք։ NEWS.am Medicine