53 views

Ճամփորդել սիրում են բոլորը, հատկապես ծովափնյա հանգստի սիրահարները մեկնելուց առաջ չպետք է մոռանան ջերմացնող ու սիրելի արևի, ծովի ջրի և մի շարք այլ գործոնների՝ մաշկի վրա ունեցող ազդեցության մասին: Շատերն ուշադրություն չեն դարձնում, բայց հանգստի մեկնելիս պետք է պատրաստվել, լուրջ ուշադրություն դարձնել և հետևել մաշկի խնամքին, քանի որ դա կարող է հանգեցնել անդառնալի հետևանքների: Հատկապես խնդիրներ ունեցող մարդիկ պետք է նախապես խորհրդակցեն իրենց մաշկաբանների հետ: Ինչպե՞ս պաշտպանել մաշկը հանգստի ընթացքում, ինչպե՞ս խուսափել խնդիրներից. այս և շատ այլ կարևոր հարցերի մասին «Արմենպրես» -ի «Հարց բժշկին» նախագծի հերթական հաղորդման շրջանակում մանրամասնում է մաշկաբան Կարեն Վարդանյանը: Մասնագետը նշեց, որ իհարկե, գաղտնիք չէ, որ ամռանն արևի ուլտրամանուշակագույն ճառագայթների ազդեցությունը մաշկի վրա ավելի բարձր է, բայց կան մաշկային որոշ խնդիրներ, որոնց պարագայում արևից պաշտպանությունը խորհուրդ է տրվում իրականացնել ամբողջ տարին: «Մաշկաբաններս արևից պաշտպանվելու մասին ավելի հաճախ սկսում ենք խոսել մայիս ամսից, երբ ջերմաստիճանը բարձրանում է, քանի որ ուլտրամանուշակագույն ճառագայթները մելանոմա հիվանդության` մաշկի չարորակ նորագոյացության առաջացման հիմնական պատճառներից են: Նշեմ, որ հանգստի մեկնելն առհասարակ մարդու համար կարևորագույն կետերից մեկն է, բայց ցանկացած կենսակերպի փոփոխություն պարունակում է որոշակի ռիսկեր: Եթե խոսում ենք ամառվա հանգստի մասին՝ մասնավորապես ծովափնյա, ապա առաջին տեղում ուլտրամանուշակագույն ճառագայթներն են. առավոտյան 10:00-ից մինչև 17:00-ն ընկած ժամանակահատվածում արևի ճառագայթներն ունեն վնասակար ազդեցություն, իսկ մնացած ժամերին՝ հակառակը»,- նշեց Կարեն Վարդանյանը: Մասնագետն ընդգծեց, որ գրագետ և ճիշտ ընտրված արևապաշտպան միջոցի օգտագործումը հանգստի մեկնելուց առաջ ամենակարևոր քայլերից մեկն է: «Եթե հանգիստը ենթադրում է ջրի առկայություն, ապա ցանկալի է նախընտրությունը տալ ջրակայուն արևապաշտպան միջոցներին, երեխաների համար, բնականաբար, ընտրել մանկական արևապաշտպաններ»,-ասաց նա: Անդրադառնալով արևապաշտպան միջոցների վրա նշված ցուցիչներին, մասնագետը նշեց, որ այն ցույց է տալիս, թե տվյալ արևապաշտպանը ինչքա՞ն ժամանակ է մեզ պաշտպանելու: Ըստ դրա էլ պետք է ճիշտ ժամանակին այն թարմացնել, որպեսզի հնարավոր լինի լիարժեք պաշտպանել մաշկը: Երկար արևի տակ մնալն առհասարակ ի՞նչ ազդեցություն կարող է թողնել մաշկի վրա: Հնարավո՞ր է ստանալ արևայրուք՝ առանց մաշկը վնասելու: Մաշկային խնդիրներ ունեցող մարդիկ ինչպե՞ս պետք է պատրաստվեն հանգստի: Ինչպե՞ս ընտրել ճիշտ արևապաշտպան միջոցներ: Ակտիվ հանգստի սիրահարներն ինչպե՞ս պետք է խնամեն մաշկը: Այս հարցերի պատասխանները ստանալու և մասնագետի կողմից առաջարկվող լուծումներին ավելի մանրամասն ծանոթանալու համար առաջարկում ենք լսել փոդքաստը: Գայանե Գաբոյան