122 views

Մեր զրուցակիցն է «Արմենիա» ՀԲԿ քիթ-կոկորդ-ականջաբան և քիթ, կոկորդ, ականջ հիվանդությունների բաժանմունքի վարիչ Արթուր Մինասյանը. — Ինչի՞ց է առաջանում քթային դժվարաշնչությունը եւ ինչո՞ւ է պարտադիր քթով շնչելը: — Քթային դժվարաշնչությունն ունի բազմաթիվ պատճառներ, որոնցից է, օրինակ, քթի միջնապատի թեքությունը, որը կարող է ի հայտ գալ տարիքային տարբեր փուլերում՝ հիմնականում վնասվածքների պատճառով: Քթի միջնապատը թեքվելով մեկ կամ երկու կողմից` նեղացնում է անցուղին եւ խանգարում նորմալ շնչառությանը: Արդյունքում պակասում է մարդու օրգանիզմ թափանցող թթվածնի քանակը և տարիների ընթացքում զարգանում է քրոնիկ թթվածնային քաղց: Թթվածնային քաղցից տուժում է և՛ գլխուղեղը, և՛ սիրտը, և, ընդհանրապես, բոլոր օրգանները: Բացի միջնապատի թեքությունից, քթով դժվարաշնչության պատճառ կարող է լինել խեցիների հիպերտրոֆիան, հատկապես վտանգավոր է ստորին խեցիների հիպերտրոֆիան: Խեցիների հիպերտրոֆիան առաջանում է հաճախակի հարբուխներից, վարակային գործընթացներից, հատկապես, եթե ժամանակին չեն բուժվում կամ, առհասարակ, չեն բուժվում: Սա իր հերթին բերում է քրոնիկ դժվարաշնչության և ամբողջ օրգանիզմի թթվածնային քաղցի: Երբեմն այս երկու ախտաբանությունը` միջնապատի թեքությունն ու խեցիների հիպերտրոֆիան, զուգակցվում են:

Դժվարաշնչության այլ պատճառներից են ախտաբանական գոյացությունները, օրինակ` պոլիպները:

Ալերգիկ ֆոնի հետևանքով առաջացող պոլիպների հետ կապված ուսումնասիրությունները պարզել են, որ դրանց ձևավորմանը նպաստող գործոններից է օդափոխանակման գործընթացը: Երբեմն դժվարաշնչությունից կարող են գանգատվել նյարդային խնդիրներ ունեցող մարդիկ, թեև քթային շնչառությունն ազատ է: Դա արդեն նյարդային խնդիր է:

— Ի՞նչ անել, երբ կա դժվարաշնչություն: — Քթային դժվարաշնչության դեպքում առաջին հերթին պետք է դիմել բժշկի: Մարդիկ երբեմն զբաղվում են ինքնաբուժմամբ, որի պարագայում կարող է անտեսվել առկա հիվանդությունը և արդյունքում օրգանիզմին կանգնեցնել թթվածնային քաղցի խնդրի առջև: Դժվարաշնչության բուժումը շատ հաճախ դեղորայքային չէ, քանի որ այն, ինչ մեխանիկական խոչընդոտ է ու ունի տարիների պատմություն, պետք է իրականացվի վիրահատական միջամտությամբ: Պատը թեք է՝ հարկավոր է ուղղել, խեցիները մեծ են՝ պետք է փոքրացնել:

Ի դեպ, խեցիների փոքրացման տարբեր մեթոդներ կան, ընդհուպ մինչև մասնակի հեռացում, որը կատարվում է պոլիպոզ փոփոխությունների ժամանակ: Վիրահատական միջամտությունները շատ հաճախ կատարվում են ընդհանուր անզգայացմամբ: Տեղային անզգայացում կիրառվում է ընդհանուր անզգայացման հակացուցումների դեպքում:

— Ախտորոշման ի՞նչ փուլերով է անցնում պացիենտը: — Առաջին փուլը քիթ-կոկորդ-ականջաբանի զննումն է, որը շատ տեղեկատվական է: Կասկածելի դեպքերում կատարվում է ռենտգեն կամ ՀՏ հետազոտություն, որի ժամանակ քթի խոռոչից զատ հետազոտվում են հարակից խոռոչները: Նյութի աղբյուր՝ http://armeniamedicalcenter.am/arm/news.more/54/