Հայաստանում սրտանոթային հիվանդություններով հիվանդների եւ երեխաների հոսպիտալացումների թվի աճ է գրանցվել
2022-ի առաջին 8 ամիսներին մենք 14476-ով ավելի քիչ զանգ ենք ստացել, քան 2021-ին։ Ընդհանուր առմամբ այս տարի ստացվել է 193431 կանչ։ Այս մասին սեպտեմբերի 26-ին լրագրողների հետ հանդիպման ժամանակ ասաց «Շտապբուժօգնություն» ՓԲԸ տնօրեն Թագուի Ստեփանյանը։
Նախորդ տարիներին զանգերի աճը նա բացատրեց կորոնավիրուսային հիվանդության աճով։
Կորոնավիրուսի հետ կապված այս տարի անցած տարվա համեմատ 4228-ով ավելի քիչ կանչ է ստացվել։
«Շտապբուժօգնություն» ՓԲԸ տնօրենը հայտնեց, որ երեխաների կանչերի թիվն աճել է 4769-ով, իսկ այդպիսի կանչերի ընդհանուր թիվը կազմել է 16604։
«Հոսպիտալացված քաղաքացիների թիվն ավելացել է 7255-ով, երեխաների հոսպիտալացումներինը՝ 1406-ով։
Սրտանոթային հիվանդություններով քաղաքացիների թվի ավելի քան 16.4 հազարով աճ է գրանցվել։ Երկրորդ տեղում սուր շնչառական հիվանդություններով քաղաքացիների կանչերն են (անցած տարվա համեմատ 5711-ով ավել), երրորդում՝ վնասվածքներ ստացած քաղաքացիների կանչերը (անցած տարվա համեմատ՝ 1167-ով ավել)։
Օրական միջինում ստանում ենք 750 զանգ, որից 20-25 տոկոսը՝ անհետաձգելի։ Դա լուրջ ծանրաբեռնվածություն է։ Աշխատանքի ամենածանրաբեռնված ժամերը երեկոյան են»,- ընդգծեց Ստեփանյանը։
Նա վստահեցրեց, որ շտապօգնության ավտոմեքենաները տարիներ շարունակ ունեցել են բոլոր անհրաժեշտ դեղերն ու սարքավորումները։
«Ինչ վերաբերում է ադրբեջանական վերջին ագրեսիայի ժամանակ կատարված աշխատանքներին, ապա աշխատանքները կազմակերպվել են նորմալ մակարդակով եւ տարվել Գորիսի եւ Վարդենիսի ուղղություններով»,- եզրափակեց Ստեփանյանը։
