Աղջիկը, որի մայրը քիմիաթերապիա էր ստացել հղիության ընթացքում, երկու տարեկան դարձավ
Հղիության 25 շաբաթից սկսած մինչեւ ծննդաբերություն Ասյան, որի մոտ ախտորոշվել էր ոչ հոջկինյան լիմֆոմա, քիմիաթերապիա էր ստանում։ Բուժումը նրան օգնել է հաղթահարել հիվանդությունը, ընդ որում չվնասելով նրա դստերը։ Բոլորովին վերջերս աղջիկը, ում կոչել են նրան բուժող բժշկի պատվին, 2 տարեկան դարձավ։ Բժիշկների գնահատականով՝ եւ մայրը, եւ երեխան հիմա առողջ են։
Իմանալով իր հիվանդության մասին՝ Ասյան երեք ռուսաստանյան կլինիկաներ է դիմել ու նրան ամենուրեք առաջարկել են ընդհատել հղիությունն ու քիմիաթերապիա սկսել։ Բայց Ասյան շատ էր ուզում երեխա ունենալ, դրա համար էլ որոշել է Հայաստան տեղափոխվել ու խորհրդակցել այստեղի մասնագետների հետ։ Նա հայտնվել է Յոլյանի անվան հեմատոլոգիական կենտրոնի բժշկուհի Մարինե Մելիք- Անդրեասյանի մոտ, որն ասել է, որ բուժումը հնարավոր կլինի սկսել՝ պահպանելով հղիությունը։
Նախկինում հղի հիվանդների քիմիաթերապիան սկսելուց առաջ հղիությունը միշտ ընդհատում էին, սակայն վերջին տարիներին մասնագետները սկսել են հասկանալ, , որ հղիության երկրորդ կեսին արվող աբորտն ազդում է կնոջ ֆիզիկական առողջության ու հոգեկան վիճակի վրա, ինչը նվազեցնում է բուժման արդյունավետության հավանականությունը։ Ավելին՝ առկա գիտական տվյալները ցույց են տալիս, որ հղիության ուշ փուլերում քիմիաթերապիան սովորաբար չի վնասում պտղին։
Հղիության ժամանակ Ասյան ստացել է քիմիաթերապիայի 4 կուրս։ Երկու կուրսերի միջեւ նրան կեսարյան հատում են արել, նա լույս աշխարհ է բերել հասուն, միանգամայն առողջ աղջիկ, որին որոշել են Մարինա անվանել։
Անցած տարի, երբ աղջիկը մեկ տարեկան է դարձել, ծնողները նրա լուսանկարները ուղարկել են բժշկուհի Մարինե Մելիք-Անդրեասյանին։ Բժշկուհին NEWS.am–ի թղթակցի հետ զրույցում ասել է, որ դա իրեն շատ հուզել էր։ Իսկ բոլորովին վերջերս աղջիկը 2 տարեկան է դարձել ու ծնողները նորից նամակ են գրել բժշկուհուն ու աղջկա լուսանկարներն ուղարկել։
Նյութի աղբյուրը՝ NEWS.am Medicine