Ոստիկանները կատարելագործեցին առաջին բուժօգնություն տրամադրելու հմտությունները
«Փրկել հիվանդին» առաջադրանքը ԵՊԲՀ սիմուլյացիոն ուսումնական կենտրոնում այսօր ուղղված էր ոստիկանական համակարգի ներկայացուցիչներին:
ԵՊԲՀ-ի և ՀՀ ոստիկանության նոր՝ այսօր մեկնարկած նախաձեռնության շնորհիվ ոստիկանական համակարգի աշխատակիցները հնարավորություն ունեն բարելավել և կատարելագործել առաջին բուժօգնություն տրամադրելու հմտությունները:
Հատուկ մուլյաժների ու վարժասարքերի միջոցով հմտությունները զարգացնելու դասընթացին առաջինը մասնակցեցին ՀՀ ոստիկանության պարեկապահակային ծառայության ներկայացուցիչները:
Որպես կանոն ոստիկաններն առաջինն են հայտնվում դեպքի վայրում, ականատես լինում տարբեր պատահարների, հետևաբար հաճախ առաջին անհրաժեշտ բուժօգնությունը կարող է ճակատագրական կամ վճռորոշ լինել տվյալ տուժածի կամ վիրավորի համար:
Սիմուլյացիոն կենտրոնի անեսթեզիոլոգ-ռեանիմատոլոգ Սիրանուշ Ավագյանի օգնությամբ դասընթացի ընթացքում գործնականում ստուգվեցին «Հրեշտակների գումարտակի» հմտությունները:
Բժիշկն ընդգծեց, որ առաջին բուժօգնության ժամանակ շատ կարևոր է ոչ միայն դիմացինին օգնելու պատրաստակամության, այլև համապատասխան ունակություններ դրսևորելու կարողությունը:
Լեյտենանտ Հարություն Գրիգորյանի խոսքով՝ դասընթացն արդյունավետ էր և ուսուցողական, քանի որ մասնագետները պատասխանեցին մասնակիցներին հետաքրքրող բոլոր հարցերին: Ներկայացվեցին և քննարկվեցին իրավիճակներ, որոնց ծառայողները հանդիպում են ամենօրյա աշխատանքում:
Շարունակական այս նախաձեռնության միջոցով ուժային կառույցի ներկայացուցիչները բժշկական համալսարանի Սիմուլյացիոն ուսումնական կենտրոնում նորարարական կրթական մեթոդներով կստանան անհրաժեշտ, ինչպես նաև կզարգացնեն արդեն առկա գիտելիքները:
http://www.ysmu.am/index.php?option=com_content&view=article&id=1720%3Apolice&catid=49%3Anews&Itemid=1&lang=am