Առողջական ինչ խնդիրներ կարող են առաջանալ ցավազրկողների չարաշահման հետևանքով
Մարդիկ հաճախ են մեղմում տարատեսակ ցավերը ցավազրկող դեղամիջոցների օգնությամբ, սակայն շատերը չեն նկատում, որ իրականում չարաշահում են նման դեղերը, ինչը կարող է լուրջ հետևանքներ ունենալ: Մասնագետները ներկայացրել են, թե ինչ խնդիրներ կարող են առաջանալ ցավազրկողների չարաշահման հետևանքով:
Մրսածության ու գրիպի բուժումը կարող է երկարել
Գրիպի և մրսածության դեպքում ցավազրկողներն օգնում են ազատվել ցավից, սակայն իրականում նման դեղամիջոցներն առանց բժշկի նշանակման ընդունելն այդքան էլ լավ միտք չէ, քանի որ հետազոտությունները ցույց են տվել, որ գրիպի դեմ ցավազրկողների ընդունումը վատթարացնում է հիվանդության ընթացքը:
Գլխացավն ուժգնանում է
Գլխացավի դեպքում տհաճ զգացողությունները մեղմելու համար ցավազրկողների ընդունումն ավելի շատ վնասում է, քան օգնում: Մասնագետները նշում են, որ նման դեղամիջոցների հաճախակի գործածությունը հանգեցնում է գերդոզավորման, ինչի հետևանքով գլխացավը սաստկանում է և ավելի անտանելի է դառնում:
Բարձրանում է գլխուղեղի կաթվածի և սրտամկանի ինֆարկտի հավանականությունը
Սրտամկանի ինֆարկտից հետո մարդուն առհասարակ հակացուցված է լինում որևէ դեղամիջոց ընդունել առանց բժշկի հետ խորհրդակցելու: Դանիացի գիտնականների հետազոտությունները ցույց են տվել, որ սրտամկանի ինֆարկտից հետո ցավազրկող դեղամիջոցների ընդունումը բարձրացնում է սրտամկանի ինֆարկտի կրկնության կամ գլխուղեղի կաթվածի հավանականությունը մեկ տարվա ընթացքում 59%-ով:
Վնասվում են երիկամները
Երիկամները պատասխանատու են օրգանիզմից դեղամիջոցների դուրսբերման համար, ուստի մեծ քանակությամբ դեղորայքի ընդունումը կարող է դառնալ ալերգիկ ռեակցիաների կամ երիկամների վնասվածքների առաջացման պատճառ: Հետազոտությունը ցույց է տվել, որ սուր երիկամային անբավարարության դեպքերի 20%-ի համար պատասխանատու է առանց դեղատոմսի վաճառվող ցավազրկողների սխալ գործածությունը:
Կախվածություն են առաջացնում
Ցավազրկող դեղամիջոցների երկարատև գործածությունը կարող է հանգեցնել նման դեղորայքից ֆիզիկական կախվածության զարգացման, ինչը նշանակում է, որ օրգանիզմը կարող է հարմարվել դեղահաբերի քիմիական բաղադրիչներին և կայունություն ձեռք բերել: Ի վերջո դեղորայքի ընդունումը կտրուկ դադարեցնելը կարող է հանգեցնել զրկանքի համախտանիշի:
Նյութի աղբյուրը՝ այստեղ