Ռեզուս անհամատեղելիություն
Ինչ է ռեզուս անհամատեղելիությունը
Ռեզուս անհամատեղելիությունը ախտաբանական վիճակ է, որը զարգանում է, երբ հղին ունի ռեզուս բացասական տիպի արյուն և կրում է ռեզուս դրական տիպի արյուն ունեցող պտուղ:
Որոնք են ռեզուս անհամատեղելիության պատճառները
Հղիության ընթացքում պտղի արյան կարմիր գնդիկները` էրիթրոցիտները, ընկերքի միջոցով կարող են անցնել մոր արյան մեջ: Այս դեպքում, մոր օրգանիզմը պտղի ռեզուս-դրական արյան բջիջներն ընկալում է որպես օտար մարմին և դրանց նկատմամբ արտադրում է հակամարմիններ: Այս հակառեղուսային հակամարմինները թափանցելով ընկերքը, անցնուն են պտղի արյան մեջ և սկսում են ոչնչացել պտղի արյան կարմիր գնդիկները:
Առաջնեկների մոտ սովորաբար նման խնդիր չի առաջանում, քանի որ հակառեզուսային հակամարմինների արտադրության համար պահանջվում է որոշակի ժամանակ: Ավելի հաճախ այն դիտվում է երկրորդ և հաջորդ հղիությունների ժամանակ:
Որոնք են ռեզուս անհամաեղելիության ախտանշանները
Ռեզուս անհամատեղելիությունը կարող է դրսևորվել տարբեր աստիճաններով` լինել աննշան արտահայտվածից մինչև շատ ծանր` հանգեցնելով պտղի մահվան: Քանի որ քայքայվում են պտղի արյան կարմիր գնդիկները, զարգանում է սակավարյունություն, որն իր հերթին կարող է հանգեցնել սրտային անբավարարության, շնչառական խանգարումների: Շատ ծանր դեպքերում երեխան մահանում է ծննդաբերությունից քիչ անց:
Մյուս կողմից , երբ մոր հակամարմինները քայքայում են արյան կարմիր գնդիկները, գոյանում է մեծ քանակությամբ ազատ հեմոգլոբին: Ազատ հեմոգլոբինը փոխակրպվում է բիլիռուբինի, որից երեխան սկսում է դեղնել: Առաջանում է
- արագ զարգացող դեղնուկ
- արյունազեղումներ
- գունատություն
- այտուցներ
- հևոց կամ շնչառության թուլացում
- մկանային թուլություն:
Բիլիռուբինի մեծ քանակությունը արյան մեջ խիստ վտանգավոր է: Այն ախտահարում է հատկապես գլխուղեղի բջիջները: Եվ եթե դեղնուկը նորածնի մոտ երկար պահպանվի, ապա գլխուղեղի բջիջներում առաջանում են անդառնալի փոփոխություններ, որոնք պահպանվում են արդեն ողջ կյանքի ընթացքում: Նման երեխաների մոտ կարող է նկատվել.
- մտավոր հետամնացություն
- ցնցումներ
- լսողության կորուստ
- խոսքի դժվարություն
- շարժողական խանգարումներ
- մկանային լարվածություն:
Ինչպես են բուժում ռեզուս անհամատեղելիությունը
Քանի որ ռեզուս անհամատեղելիությունը հնարավոր է կանխել, ապա կանխելը լավագույն բուժումն է: Ծանր դեպքերում կատարում են երեխայի արյան փոխարինական փոխներարկում, այսինքն քիչ-քիչ քանակությամբ, երեխայի օրգանիզմից հանուն ենարյան որոշակի քանակություն և փոխարենը ներարկում նոր` դոնորական արյուն:
Ինչպես կանխել ռեզուս անհամատեղելիությունը
Կանանց 15 տոկոսը ռեզուս բացասական է: Ռեզուս անհամատեղելիությունը հնարավոր է կանխել: Եթե Դուք ունեք ռեզուս բացասական տիպի արյուն, իսկ Ձեր ամուսինը` ռեզուս դրական, ապա ծննդաբերությունից հետո 72 ժամվա ընթացքում Դուք կստանաք իմունոգլոբուլինի հատուկ ներարկում, ինչը կկանխի Ձեր օրգանիզմում հակառեզուսային հակամարմինների առաջացումը: Այս դեպքում Ձեր հաջորդ երեխայի մոտ ռեզուս անհամատեղելիություն չի դիտվի:
Այցելեք հղիների կոնսուլտացիա հղիության ընթացքում: Այս այցերի ընթացքում անպայման կստուգեն Ձեր արյան խումբը և ռեզուս գործոնը և, այսպիսով, հնարավոր կլինի կանխել բարդությունները:
Ռեզուս բացասական կանայք հղիության արհեստական ընդհատումից հետո նույնպես պետք ք ստանան հակառեզուս-գլոբուլինի ներարկում:
Ապրեք առողջ…
Պարաստեց` Լ. Բունիաթյան