79 просмотры

Մաշկի լուսազգայունության խանգարումներ և արևային եղնջացան Հաշվի առնելով վերջին շրջանում «արևի հանդեպ ալերգիայի» վերաբերյալ բուռն քննարկումները վարորդների հանրության շրջանում` ԵՊԲՀ «Հերացի» համալսարանական հիվանդանոցի ալերգոլոգիայի և իմունոլոգիայի կլինիկայի ղեկավար, Կլինիկական ալերգոլոգիայի ամբիոնի վարիչ Արմինե Հակոբյանն անդրադարձել է թեմային: Արևային եղնջացան Արևային եղնջացանը առաջանում է արևի լույսի անմիջական ազդեցությունից հետո և դրսևորվում է ցանով և քորով, արևի տակ բաց մաշկով գտնվելուց հետո (հաճախ, նաև բարակ հագուստի և մեքենայի ապակու առկայության դեպքում): Հետազոտությունները ցույց են տվել, որ եղնջացանի այս տեսակը շատ հազվադեպ է, կազմելով բոլոր եղնջացաների մոտ 0.5%ը։ Քանի որ լիովին պարզ չէ, թե ինչն է առաջացնում արևային եղնջացան, այդ վիճակը կանխելու որևէ հատուկ մոտեցում դեռևս չկա, ինչպես նաև մեքենայի մգեցված ապակիները՝ որպես կանխարգելում, որևէ ապացուցողական հիմք չունեն։ H1 հակահիստամինները ապահովում են սիմպտոմատիկ բուժում: Տեղային և համակարգային ստերոիդները կարող են օգտագործվել, եթե հակահիստամինայինները բավարար չեն: Մաշկի լուսազգայունության խանգարումներ Մաշկի լուսազգայունության խանգարումները՝ ֆոտոդերմատոզները մաշկի ցանավորմամբ և տհաճ զգացումներով (քոր, մրմռոց) ուղեկցվող վիճակներ են, որ առաջանում են արևի լույսի, սովորաբար, դրա ուլտրամանուշակագույն բաղադրիչի նկատմամբ ոչ նորմալ ռեակցիայի հետևանքով: Ֆոտոդերմատոզները կարող են առաջանալ որպես ինքնուրույն հիվանդություն կամ հարուցված լինել որոշակի դեղերի, քիմիական նյութերի օգտագործմամբ, ինչպես համակարգային, այնպես էլ տեղային կիրառման դեպքում։ ՖՈՏՈԶԳԱՅՈՒՆՈՒԹՅԱՆ ՀԻՄՆԱԿԱՆ ԿԱՆԽԱՐԳԵԼԻՉ ՄԻՋՈՑԸ ԱՐԵՎԱՊԱՇՏՊԱՆ ՔՍՈՒՔՆԵՐՆ ԵՆ Արևապաշտպան քսուքները լավագույնս զտում են ուլտրամանուշակագույն ճառագայթները: Առավել արդյունավետ լինելու համար դրանք պետք է մանրակրկիտ և հաճախակի քսել ամբողջ բաց մաշկին: Արևապաշտպան միջոցները հաճախ չեն կարողանում լիովին կանխել ֆոտոդերմատոզը, սակայն, կարող են զգալիորեն թեթևացնել դրա ընթացքը: Ընտրել արևապաշտպան քսուքը բարձր արևապաշտպան գործակցով (SPF 50+) և ջրակայունությամբ։ Արևապաշտպան քսուքները, որոնք պարունակում են ցինկ, կարող են ավելի արդյունավետ լինել, քանի որ դրանք ավելի շատ ուլտրամանուշակագույն ճառագայթներ են զտում: Արևապաշտպան քսուքները նվազեցնում են նաև մաշկի քաղցկեղի և նախաքաղցկեղային հիվանդությունների ռիսկը: