83 просмотры

Հայաստանում վերջին անգամ 1995-ին է գրանցվել պոլիոմելիտի դեպք, մինչ այդ վիրուսը տարեկան 2-3 երեխայի՝ հաշմանդամություն ձեռք բերելու պատճառ էր հանդիսանում։ ԵՐԵՎԱՆ, 21 մայիսի — Sputnik. Իրանում հայտնաբերվել է վայրի պոլիոմելիտի հարուցիչ, վտանգը բավականին մեծ է, որ վիրուսը կարող է նաև Հայաստան ներթափանցել։ Այսօր լրագրողների հետ հանդիպման ժամանակ հայտարարեց առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական Գայանե Սահակյանը։ «Աշխարհում միայն Պակիստանում, Նիգերիայում և Աֆղանստանում է շարունակվում շրջանառվել վայրի պոլիոմելիտի վիրուսը, և Իրան այն ներթափանցել է Պակիստանից։ Հայաստանում պատվաստումների նվազում է նկատվում, ինչը պարարտ հող է՝ վարակների տարածման համար։ Մեր երկրում վերջին անգամ 1995-ին է գրանցվել պոլիոմելիտի դեպք, իսկ մինչ այդ վիրուսը տարեկան 2-3 երեխայի՝ հաշմանդամություն ձեռք բերելու պատճառ էր հանդիսանում»,-ասաց նա։ Նա հայտնեց նաև, որ պոլիոմելիտը բարձր վարակելիության վիրուսային հիվանդություն է, որով վարակվում են հիմնականում 2-5 տարեկան երեխաները։ Վարակը հիվանդ մարդուց մարդուն փոխանցվում բերանակղանքային, ինչպես նաև օդակաթիլային ճանապարհներով։ Սահակյանը տեղեկացրեց նաև, որ վիրուսն ախտահարում է նյարդերը՝ առաջացնելով հաշմանդամություն։ Սահակյանը նշեց, որ պոլիոմելիտի դեմ պատվաստումների ցուցանիշում 2018-ին նվազում է նկատվել, ինչը հեռու է ցանկալի արդյունքից։ «2018-ին 2 տարեկանների շրջանում պոլիոմոլիտի դեմ պատվաստումները 93 տոկոս են կազմել՝ 2017-ի 95 տոկոսի փոխարեն։ Ավելին, Հայաստանում կան մի շարք համայնքներ, որտեղ այդ պատվաստման ցուցանիշը 60 տոկոսի է հասնում։ Սա շատ վատ ցուցանիշ է»,–ասաց նա։ Սահակյանը տեղեկացրեց նաև, որ ընթացիկ տարվա մայիսի 20-ից հունիսի 20-ն ընկած ժամանակահատվածում 1.5-5 տարեկան երեխաների շրջանում իրականացվելու են պոլիոմելիտի դեմ լրացուցիչ պատվաստումներ։ Նա հորդորեց ծնողներին, որ բոլոր այն երեխաները, որոնք թերի կամ առհասարակ չեն պատվաստվել, լրացնեն այդ բացը։ Read more: armeniasputnik.am