Գեղարքունիքի մարզի Շատջրեք-Վարդենիս ճանապարհին տեղի ունեցած ողբերգական ավտովթարից հետո «Սուրբ Աստվածամայր» ԲԿ տեղափոխված երեխաները շարունակում են բուժվել
Գեղարքունիքի մարզի Շատջրեք-Վարդենիս ճանապարհին տեղի ունեցած ողբերգական ավտովթարից հետո «Սուրբ Աստվածամայր» ԲԿ տեղափոխված երեխաները շարունակում են բուժվել Հանրապետության միակ մանկական պոլիտրավմայի կենտրոնում: Չնայած եղանակային վատ պայմաններին ու մառախուղին՝ բուժկենտրոնի բժիշկները երեխաներին սանավիացիայի ուղղաթիռով են տեղ հասցրել: Ամեն վայրկյանը թանկ էր:
Երկու կյանք խլած վթարից 10-ամյա աղջնակը ստացել է գանգուղեղային տարբեր վնասվածքներ, գանգի կոտրվածք, արյունազեղում, թոքերի երկկողմանի սալջարդ, ձախակողմյան թոքի պատռվածք, ողերի կոտրվածքներ, ձախ բազկոսկրի կոտրվածք: Բուժկենտրոն է ընդունվել ծայրահեղ ծանր վիճակում, 2-3 աստիճան կոմայով, միացված է եղել արհեստական շնչառության սարքին: Այժմ շնչում է ինքնուրույն, առկա է քիչ, բայց դրական դինամիկա: Գտնվում է վերակենդանացման բաժանմունքում, ստանում է համապատասխան բուժում նաև նյարդավիրաբուժական, կրծքային վիրաբուժական ու վնասվածքաբանական բաժանմունքների մասնագետների կողմից:
6-ամյա տղայի մոտ էլ առկա էր գանգուղեղային վնասվածներ, ուղեղի ցնցում: Նյարդավիրաբուժական բաժանմունքի հմուտ մասնագետների ջանքերի շնորհիվ տղան դուրս է գրվել բուժկենտրոնից:
