Ինչպես է COVID-19-ն անդրառնում աղեստամոքսային տրակտի վրա․ 3 ախտանշան, որոնք չի կարելի անտեսել
COVID-19-ի զարգացման համար պատասխանատու SARs-COV-2 վիրուսը սովորաբար ներթափանցում է շնչուղիներ և ախտահարում շնչառական համակարգը՝ առաջացնելով հազ, հևոց ու շնչառության դժվարացում։ Այս ախտանշանները համարվում են հիվանդության «դասական» ախտանշանները, սակայն կորոնավիրուսի ժամանակ երբեմն ի հայտ են գալիս նաև մի շարք այլ ախտանշաններ, որոնք սովորաբար չեն ասոցացվում այս վիրուսի հետ։
Բանն այն է, որ վիրուսը կարող է կպչել ACE2 ընկալիչներին, որոնք գտնվում են մի շարք օրգանների, այդ թվում նաև աղեստամոքսային տրակտի բջիջների բջջաթաղանթներում։ Սա հանգեցնում է այս օրգանների ախտահարման, ինչն էլ իր դրսևորումն է ունենում մի շարք արտասովոր ախտանշաններով։ Ընդ որում՝ աղեստամոքսային տրակտի ախտահարման մասին հուշող ախտանշանները տարբեր մարդկանց մոտ տարբեր կարող են լինել, ուստի ոչ մի դեպքում չի կարելի անտեսել այս համակարգի հետ կապված ցանկացած արտասովոր ախտանշան։
Ձեր ուշադրությանն ենք ներկայացնում քովիդի ժամանակ նկատվող ամենատարածված ախտանշանները, որոնք նկատելու դեպքում հարկավոր է անհապաղ դիմել մասնագետին։
Փորլուծություն ու որովայնի ցավեր
Հետազոտությունները ցույց են տվել, որ քովիդի դեպքում հինգ հիվանդից մեկի մոտ նկատվում են մարսողության խանգարումներ, որոնք ուղեկցվում են փորլուծությամբ կամ որովայնի ցավերով։ Որոշ բժիշկներ նշում են, որ փորձը ցույց է տվել՝ այս ախտանշանների առկայության դեպքում կորոնավիրուսով հիվանդներին ավելի շատ ժամանակ է հարկավոր լինում վիրուսն օրգանիզմից զտելու ու դուրս բերելու և այդ կերպ հիվանդությունը հաղթահարելու համար։
Ախորժակի կորուստ
Չինացի գիտնականների հետազոտությունները ցույց են տվել, որ Չինաստանում քովիդով հիվանդների մոտ 80%-ը գանգատվում էին հիվանդության ընթացքում ախորժակի կորստից, ուստի այս ախտանշանը ևս չի կարելի անտեսել։
Սրտխառնոց
Բավական հաճախակի բնույթ է կրում նաև սրտխառնոցը, որը կարող է ուղեկցվել նաև փորլուծությամբ։ Կորոնավիրուսային վարակով հիվանդների մոտ 10%-ի մոտ սրտխառնոցն ի հայտ է գալիս տենդի զարգացումից երկու օր առաջ։
Այս ախտանշանները ոչ միշտ են պայմանավորված լինում կորոնավիրուսով, սակայն դրանցից մեկի կամ մի քանիսի առկայության դեպքում այնուամենայնիվ հարկավոր է անպայման դիմել մասնագետին։ Դրանք հատկապես վտանգավոր են լինում մարմնի ջերմաստիճանի բարձրացմամբ, հազով կամ հոգնածությամբ ուղեկցվելու դեպքում, ուստի նման դեպքերում բուժզննում անցնելն ու թեստավորվելը շատ կարևոր է։
