Ինքնաթիռի անձնակազմն ու ուղեւորները 10 000 մետր բարձրության վրա ծնունդ են ընդունել
Դոմինիկյան Հանրապետություն թռչելիս հենց ինքնաթիռում սկսվել են 21-ամյա ամերիկուհու ծննդաբերության ցավերը, գրում է Daily Mail-ը։
Աղջիկը բորտուղեկցորդուհուն հայտնել է իր վիճակի մասին, նրան տարել են ինքնաթիռի պոչի մասը եւ նստեցրել դատարկ տեղերում։ Օդաչուն բարձրախոսով հայտարարել է, որ անձնակազմին բժիշկ է պետք, եւ խնդրել է ուղեւորներին արձագանքել։ Երիտասարդ կնոջը օգնության են եկել չորս բժիշկներ, որոնք նրա հետ ինքնաթիռում են եղել։ 20 րոպե անց առողջ երեխա է ծնվել։
Ինքնաթիռը հարկադիր վայրէջք է կատարել, փոքրիկն ու մայրը հոսպիտալացվել են մոտակա հիվանդանոց, նա չորս օր անցկացրել է վերակենդանացման բաժանմունքում, քանի որ ծննդաբերությունը վաղաժամ է եղել։ Տղային անվանել են Սքայլեն, բժիշկները երիտասարդ կնոջ եւ երեխայի վիճակը բավարար են գնահատում։
