Նշի յուղի ամենաօգտակար հատկությունները
Նշի յուղը շատ տարածված մթերք է կոսմետոլոգիայում, քանի որ օժտված է բազմաթիվ օգտակար հատկություններով և օգնում է պահպանել գեղեցկությունը, սակայն այն նաև շատ առողջարար է և օգնում է պայքարել առողջական ամենատարբեր խնդիրների դեմ, ինչի մասին, սակայն, ոչ բոլորը գիտեն։
Դեղին երանգով ու հաճելի համով այս յուղը գրեթե չունի հակացուցումներ և անհատական անհանդուրժողականության բացակայության դեպքում այն կարող է օգտագործել յուրաքանչյուրը։ Այն հարուստ է մեծ քանակությամբ պոլիչհագեցած ճարպաթթուներով, վիտամիններով ու այլ սննդարար նյութերով, ինչի շնորհիվ շատ օգտակար է մաշկի, մազերի և առհասարակ օրգանիզմի ներքին համակարգերի համար։
Մասնագետները ներկայացրել են այս յուղի ամենաօգտակար հատկությունները, որոնց շնորհիվ այն օգնում է պահպանել առողջությունն ու գեղեցկությունը։
Խոնավացնում է մաշկը
Այս յուղը շատ արագ ներծծվում է և արդյունավետ կերպով խոնավացնում է մաշկը։ Ընդ որում՝ այն կարելի է կիրառել մաշկի ցանկացած տեսակի դեպքում։ Այն հատկապես օգտակար է չոր, ծերացող ու նուրբ մաշկի համար։ Այս յուղը խոնավացնում է մաշկը, սնուցում է, երիտասարդացնում, հանգստացնում ու փափկեցնում։ Բացի այդ, այն օժտված է նաև հզոր հակաբորբոքային հատկություններով։
Նպաստում է հյուսվածքների երիտասարդացմանը
Նշի յուղն օգնում հնարավորինս երկար պահպանել մաշկի թարմությունն ու երիտասարդությունը։ Այն դանդաղեցնում է ծերացման բնական գործընթացներն ու պաշտպանում է արևի ուլտրամանուշակագույն ճառագայթների ազդեցությունից։Պարբերաբար գործածելու դեպքում կարելի է հեշտությամբ ազատվել մանր կնճիռներից ու պաշտպանել մաշկն արևից։
Ազատում է բորբոքումներից ու գրգռվածությունից
Իր հակաբորբոքային ազդեցության շնորհիվ նշի յուղն օգնում է ազատվել մանր բորբոքումներից ու գրգռվածություններից։ Բացի այդ, այս մթերքը հիանալի միջոց է մաշկի թեփոտվածությունից ազատվելու և հյուսվածքներին առաձգականություն ու տոնուս հաղորդելու համար։ Այն հատկապես օգտակար է զգայուն մաշկի համար։
Խթանում է մազերի աճը
Այս յուղն օգտակար է ոչ միայն մաշկի, այլև մազերի համար։ Այն ամրապնդում է մազարմատները, առաձգականություն է հաղորդում, սնուցում է մազերն ու խթանում է մազերի աճը։ Նման ազդեցության շնորհիվ մազերն ամրանում են և առողջ փայլ են ստանում։
Նվազեցնում է խոլեստերինի մակարդակը
Նշի յուղն օգնում է նվազեցնել արյան մեջ խոլեստերինի մակարդակը, ինչի շնորհիվ նվազում է նաև սրտանոթային հիվանդությունների զարգացման հավանականությունը։
Ազատում է մաշկային խնդիրներից
Նշի յուղը հիանալի միջոց է մաշկային տարբեր խնդիրներից ազատվելու համար։ Այն օգնում է պայքարել անոթային աստղիկների, հերպեսի, տարատեսակ վնասվածքների, էկզեմայի և դերմատիտների դեմ, ինչպես նաև բուժում է այրվածքները, այդ թվում նաև արևային։ Բացի այդ, այս յուղն օժտված է նաև ցավազրկող ու ջերմացնող հատկություններով, ինչի շնորհիվ օգնում է ազատվել ականջի ցավից։ Պարզապես հարկավոր է մի քանի կաթիլ յուղը կաթեցնել ականջի մեջ։
Նյութի աղբյուրը՝ med.tert.am