67 просмотры

Ամբողջ աշխարհում, այդ թվում նաև Հայաստանում, օրեցօր մեծանում է թմրամիջոցների շրջանառությունը և օգտագործողների թիվը: Թմրանյութերի պարբերաբար օգտագործումը կարող է հանգեցնել թե՛ հոգեկան, թե՛ ֆիզիկական լուրջ խնդիրների: «Արմենպրես» -ի «Հարց բժշկին» նախագծի հերթական հաղորդման շրջանակում Առողջապահության նախարարության թմրաբանության գծով խորհրդական, «Կախվածությունների բուժման ազգային կենտրոն»-ի տնօրեն, բժիշկ Սուրեն Նազինյանի հետ զրուցել ենք Հայաստանում թմրանյութերի կիրառման դինամիկային, դրա ազդեցություններին և բուժման գործընթացին: Բժիշկ Նազինյանը նշեց, որ կենտրոնը զբաղվում է քիմիական և ոչ քիմիական կախվածությունների բուժմամբ: Կենտրոնն ունի լաբորատոր ախտորոշիչ բաժանմունք, պահեստ, մեթադոնային, փոխարինող բուժման հատված, վարչական հատված, դիսպանսերային բաժանմունք, ստացիոնար բաժանմունք, տոքսիկոքիմիական լաբորատորիա: «Կենտրոնում մեր պացիենտներին տրամադրվում է նաև սոցիալ-հոգեբանական աջակցություն: Հոգեբանական ծառայությունը մատուցվում է ոչ միայն կախվածություն ունեցող անձանց, այլև հարկ եղած դեպքում նաև նրանց ընտանիքի անդամներին, հարազատներին»,- ասաց Նազինյանը: Մասնագետը նշեց, որ ինչպես ամբողջ աշխարհում, այնպես էլ Հայաստանում ցավոք, թմրանյութերի գործածման աճ է գրանցվում, ընդ որում, բացի օգտագործողների թվաքանակի ավելացումը, նաև որոշակի երիտասարդացում է նկատվում՝ երիտասարդների կողմից թմրանյութերի չարաշահում մոտ 10 տարի առաջ արդի չէր: «Ցավոք պետք է նշեմ, որ հիմա նույնիսկ թմրանյութեր գործածող անչափահասներ են հանդիպում»,-ասաց նա: Առողջապության նախարարությունը իրականացնում է իրազեկման աշխատանք, բայց մասնագետը հորդորեց բոլոր ծնողներին լինել շատ զգոն և ուշադիր իրենց երեխաների նկատմամբ, քանի որ թմրանյութերը ազդում են բոլոր օրգանհամակարգերի վրա՝ այդ թվում նաև կարող են լուրջ հետք թողնել առողջ սերունդ ունենալու վրա: Հարցին, թե արդյո՞ք հնարավոր է բուժման փուլի վերջում գրանցել լիարժեք արդյունք և ազատվել թմրամիջոցների կիրառումից, մասնագետը պատասխանեց, որ այո, հնարավոր է, բայց մի շատ կարևոր հանգամանք կա. ի տարբերություն մնացած խռոնիկ հիվանդությունների, այս պարագայում մարդու գործոնը շատ կարևոր է: «Այսինքն մեր կենտրոնից դուրս գրվող բոլոր հիվանդները թմրամիջոցների, ալկոհոլի կամ այլ հոգեներգործության նյութերի հանդեպ հիվանդագին հակում չեն ունենում, բայց պետք է ունենան մեծ կամքի ուժ, քանի որ մեկ անգամ փորձելուց հետո մեծ է հավանականությունը, որ նորից կունենան սրացում»,- նշեց Նազինյանը: Հիմնականում ո՞ր տարիքային խումբն է համարվում ռիսկային։ Ի՞նչ մեթոդներ են կիրառվում թիրախային խմբերին հեռու պահելու թմրանյութերից և այլ քիմիական նյութերից։ Հայաստանում ի՞նչ տեսակի թմրամիջոցներ են ավելի շատ օգտագործվում: Թմրանյութերի կիրառումը ի՞նչ ազդեցություն կարող է թողնել օրգանիզմի վրա, անգամ բուժվելուց հետո: Այս հարցերի պատասխանները ստանալու և մասնագետի կողմից առաջարկվող լուծումներին ավելի մանրամասն ծանոթանալու համար առաջարկում ենք լսել փոդքաստը: Ô³Õ¡ÕµÕ¡Õ¶Õ¥ Ô³Õ¡Õ¢Õ¸ÕµÕ¡Õ¶