55 просмотры

Հայաստանի կառավարությունը ավելացրել է երեխա ունեցող ընտանիքների բնակարանային ապահովության պետական աջակցության ծրագրերի ֆինանսավորումը: «Արմենպրես»-ի մամուլի սրահում ՀՀ աշխատանքի և սոցիալական հարցերի նախարարության կառուցվածքային ստորաբաժանումների առանձին գործառույթներ համակարգող խորհրդական Գայանե Ղարագյոզյանը նշեց, որ բյուջեից շուրջ 400 միլիոն դրամի վերաբաշխում է կատարվել: «2022 թվականին գրանցվել էր դիմումների աննախադեպ աճ: Պետական բյուջեով նախատեսվել էր 1 միլիարդ 200 միլիոն դրամ, որը համամասնորեն բաշխվել էր եռամսյակի մեջ, և մենք մայիս ամսվա կեսերին սպառել էինք այդ գումարը»,- ասաց բանախոսը՝ հավելելով, որ 900 շահառու արդեն օգտվել է ծրագրից: «Այս պահի դրությամբ 230 շահառու սպասում է իր աջակցությանը»,- ասաց նա: Գայանե Ղարագյոզյանի խոսքով՝ 2021 թվականին աջակցություն ստացողների թիվը եղել է 1 750 : Փաստացի ծախսը կազմել է 1 միլիարդ 230 միլիոն դրամ: Ծրագրի մեկնարկից՝ 2020 թվականի հուլիսի 1-ից որևէ քաղաքացի չի մերժվել ֆինանսներ չլինելու պատճառով: «Ծրագրի մեկնարկից ի վեր 3 250 շահառու օգտվել է աջակցությունից, որից 583-ը՝ միանվագ դրամական աջակցության ծրագրով, 830-ը՝ կանխավճարի ապահովագրության ծրագրով և 1 837-ը՝ երեխայի աջակցության ծրագրով: Ակտիվությամբ Երևանից հետո առաջին տեղում Կոտայքի մարզն է, ապա Լոռին, Արարատը, Սյունիքը»,- ասաց Ղարագյոզյանը: Նշենք, որ 2020 թվականի հուլիսի 1-ից աշխատանքի և սոցիալական հարցերի նախարարությունն կողմից իրականացնում է երեխա ունեցող ընտանիքների բնակարանային ապահովության պետական աջակցության ծրագրեր, որոնք ուղղված են ժողովրդագրական իրավիճակի բարելավմանը և ծնելիության խթանմանը: Ծրագրերից առաջինը միանվագ աջակցության ծրագիրն է, որի շրջանակում առնվազն երկու անչափահաս երեխա ունեցող ընտանիքներին տրամադրվում է ֆինանսական աջակցություն մարզային բնակավայրում անշարժ գույք ձեռք բերելու կամ անհատական բնակելի տուն կառուցելու համար: Գույքի արժեքը չպետք է գերազանցի 30 միլիոնը, որը երրորդ և հաջորդ երեխայի հաշվով ավելանում է ևս 5 միլիոն դրամի չափով: Շահառուն պետք է կատարի առնվազն 10 տոկոս կանխավճար երկրորդային շուկայի դեպքում և 7,5 տոկոս կանխավճար, եթե գույքը ձեռք է բերվում առաջնային շուկայից: Շահառուն վարկը պետք է վերցնի նախարարության հետ համագործակցող բանկերից կամ վարկային կազմակերպություններից: Հաջորդը կանխավճարի ապահովագրության ծրագիրն է, որը տրվում է առնվազն մեկ անչափահաս երեխա ունեցողներին: Աջակցությունն ուղղվում է կանխավճարի և ապահովագրավճարի մարմանը: Պարտադիր է, որ շահառուն ունենա առնվազն մեկ անչափահաս երեխա: Գույքի գինը պետք է չգերազանցի 30 միլիոն դրամը: Ամենաակտիվ ծրագիրը՝ երրորդը, երեխայի ծննդյան աջակցության ծրագիրն է, որը հիփոթեքային վարկ մարող ընտանիքում նոր երեխա ծնվելու դեպքում է տրամադրվում, և որն ուղղվում է մայր գումարի մարմանը: Պարտադիր է, որ շահառուն դիմի մինչև երեխայի մեկ տարին լրանալը, գույքի գինը պետք է չգերազանցի 30 միլիոնը, որը ևս երրորդ և հաջորդ երեխայի դեպքում ավելանում է հինգ միլիոն դրամով: