65 просмотры

Հակաբիոտիկների ոչ տեղին օգտագործումը, չարաշահումը կարող է անմիջական, ինչպես նաև հեռահար վնաս հասցնել մեծահասակների կամ երեխաների առողջությանը: Բոլոր դեպքերում խիստ անհրաժեշտ է իրականացնել համապատասխան հետազոտություններ, հասկանալ հստակ խնդիրը և կարիքի դեպքում նոր նշանակել համապատասխան հակաբիոտիկ: «Արմենպրես» -ի թղթակցի հետ զրույցում այս մասին ընդգծեց ՀՀ գլխավոր մանկաբույժ Սերգեյ Սարգսյանը՝ նշելով, որ ավելորդ խնդիրներից խուսափելու նպատակով այժմ Հայաստանում անցկացվում է հակաբիոտիկների կայունության դեմ պայքարի իրազեկման շաբաթ: Գլխավոր խնդիրն այն է, որ պատմականորեն ձևավորվել է մի տեսակետ, իհարկե, առաջին հերթին բժիշկների գործունեության արդյունքում, մյուս կողմից էլ՝ բնակչության, որ շատ դեպքերում առանց հակաբիոտիկների բուժումն անհնար է: Եվ, քանի որ շնչառական հիվանդություններն ավելի տարածված են երեխաների շրջանում, կարելի է ասել հակաբիոտիկների կիրառումը երեխաների պարագայում գրեթե նորմա է դարձել: Մոտ 25 տարի առաջ մեր կողմից իրականացրած դիտարկումը ցույց է տվել, որ բուժհաստատություններ այցելող երեխաների գրեթե 100 տոկոսը դուրս էին գալիս հիվանդանոցից արդեն հակաբիոտիկի նշանակում ստացած, որը շատ ահռելի մեծ թիվ է»,- ասաց մանկաբույժը: Մասնագետը շեշտեց, որ պատկերը փոխելու համար այս տարիներին իրականացվել են բավականին շատ կրթական ծրագրեր, դասընթացներ և տարիների ընթացքում կա դրական առաջընթաց, բայց, այնուամենայնիվ, դեռ շատ են դեպքերը, երբ չի պահանջվում հակաբիոտիկային բուժում, բայց այն նշանակվում է: «Այս ամենից խուսափելու համար նախ պետք է հստակեցնել բժշկական պրակտիկաները, որոնք մեր կողմից մշակվել են և ներդրվել են դասընթացներում: Այնտեղ ներգրավված են այնպիսի մոտեցումներ, որոնք առնչվում են հակաբիոտիկների հստակ նշանակմանը: Անհրաժեշտ է ստուգել, կատարել համապատասխան թեստեր՝ հասկանալու համար, թե արդյոք պետք է նշանակել հակաբիոտիկ»,-ասաց նա: Մանկաբույժը հավելեց, որ դրանից բացի, խնդիր կա նաև դեղաչափի նշանակման հարցում, որոշ դեպքերում դա ոչ ճիշտ է արվում: Հաճախ էլ բուժառուները, նշանակումից հետո որոշում են այլ կերպ օգտագործել հակաբիոտիկը, ինչը կարող է հանգեցնել լուրջ խնդիրների: Անդրադառնալով հարցին, թե ո՞ր դեպքում է անհրաժեշտ հակաբիոտիկներ նշանակել՝ մանկաբույժ Սերգեյ Սարգսյանը նշեց, որ հակաբիոտիկները կարելի է նշանակել այն դեպքերում, երբ մանրէների առկայության հավանականությունը բավականին բարձր է: Օրինակ, թոքաբորբերի, ականջի բորբոքումների դեպքում և երբ կա մանրէական ծագման կոկորդի բորբոքում: Ոչ բոլոր դեպքերում, բայց մեծամասամբ անհրաժեշտ է հակաբիոտիկների կիրառում