45 просмотры

Երևանում դպրոցականների համար նոր ուսումնական տարին կսկսվի անակնկալներից։ Նորամուծությունը կտարածվի մայրաքաղաքի 30 դպրոցներում։ ԵՐԵՎԱՆ, 5 հունիսի — Sputnik, Լաուրա Սարգսյան. Երևանի քաղաքապետարանը նոր համակարգ է նախաձեռնել մայրաքաղաքի դպրոցներում` հաճախելիությունը վերահսկելու և անվտանգության մակարդակը բարձրացնելու համար։ Համակարգն առայժմ գտնվում է մշակման փուլում և կներդրվի նոր ուսումնական տարում։ Այդ մասին Sputnik Արմենիայի թղթակցի հետ զրույցում ասաց Երևանի քաղաքապետարանի մամուլի քարտուղար Հակոբ Կարապետյանը։ Նորամուծության համաձայն, դպրոցականներին կբաժանվեն պլաստիկ քարտեր, որոնք կարձանագրեն դպրոցի շենք մտնելու և շենքից դուրս գալու ժամանակը։ Ծնողները նույնպես կարող են ցանկության դեպքում տեղեկություն ստանալ այն մասին, որ իրենց երեխան դուրս է եկել դպրոցից։ «Նպատակը դպրոցներում անվտանգության մակարդակը բարձրացնելն է։ Քարտերն անվճար կտրամադրվեն։ Տվյալ պահին մենք խորհրդատվություններ ենք անցկացնում դպրոցների տնօրենների, կրթության, արտակարգ իրավիճակների նախարարությունների հետ` օպտիմալ մոդել մշակելու, թեր և դեմ կողմերն ու ռիսկերը հաշվի առնելու համար», – ասաց Կարապետյանը։ Համակարգի գործունեության մանրամասներն ավելի ուշ հայտնի կդառնան, քանի դեռ այն գտնվում է մշակման փուլում։ Այն հարցին, թե համակարգը երբ կսկսի գործել, Կարապետյանն ասաց, որ նոր ուսումնական տարում, սակայն ստույգ ժամկետներն առայժմ անհայտ են։ Նման համակարգ ներմուծելու մասին նորությունը լուրջ իրարանցում է առաջացրել ինչպես ծնողների, այնպես էլ դպրոցների տնօրենների շարքում։ Ոմանց գաղափարը փայլուն է թվացել, մյուսներին` անիմաստ։ «Տարրական դասարաններում դա անիմաստ է, քանի որ ամեն դեպքում մենք` ծնողներս, երեխաներին տանում ենք դպրոց և վերցնում այնտեղից», – Sputnik Արմենիայի թղթակցի հետ զրույցում ասաց մի ծնող` Անին։ Նրա հետ համակարծիք չեն ավագ դասարանների աշակերտների ծնողները` համարելով, որ համակարգը կօգնի ավելի հանգիստ լինել դպրոցի անվտանգության համար։ Առանց քարտի ոչ բոլորը կարող են մտնել կրթական հաստատություն։ Միակ բանը, որն անհանգստացնում է ավագ դասարանների ծնողներին, այն է, թե ինչպիսի միջոցներ կձեռնարկվեն, եթե երեխան հանկարծ քարտը մոռանա տանը։ Այն դպրոցներից մեկի տնօրենը, որտեղ պետք է ներդնեն այդ համակարգը, դժվարացավ պատասխանել այն հարցին, թե արդյոք այդ միջոցն արդյունավետ կլինի։ «Կներդնեն, այդ ժամանակ էլ կգնահատենք», – ասաց նա։ Միաժամանակ կենտրոնում գտնվող մեկ այլ դպրոցի տնօրեն, հակառակը, կողմ է այդ նախաձեռնությանը։ «Ես վաղուց էի երազում, որպեսզի Հայաստանում ներմուծվի նման համակարգ։ Տեսել եմ շատ երկրներում և միշտ մտածում էի, որ լավ կլիներ, եթե մեզ մոտ նման բան ներդնեն», – Sputnik Արմենիայի թղթակցի հետ զրույցում ասաց տնօրենը։ Նա վստահ է, որ դա կնպաստի աշակերտների կարգապահությանը և իսկապես դպրոցներում կբարձրացնի անվտանգության մակարդակը։ Նրա կարծիքով` ծնողները երբեմն չգիտեն, որ իրենց երեխաները փախչում են վերջին դասերից, և համակարգը կարող է լուծել այդ խնդիրը։ Ծնողները ցանկության դեպքում կկարողանան ծանուցում ստանալ, և դա կհեշտացնի ոչ միայն իրենց, այլ նաև դպրոցի ղեկավարության կյանքը։ «Իսկ այն հարցը, թե ինչ կլինի, եթե երեխան կորցնի քարտը, պետք է լուծվի, ներդրվի այլընտրանքային տարբերակ։ Սակայն դա չպետք է սովորություն դառնա։ Ի դեպ, այդ միջոցը կօգնի երեխաների մոտ զարգացնել պատասխանատվության և կարգապահության զգացմունք», – ասաց նա։ Համակարգը նաև թույլ կտա գրիպի կամ այլ համաճարակների բռնկումների ժամանակ առողջապահության նախարարությանը հստակ և օպերատիվ տվյալներ տրամադրել դպրոցներում հաճախելիության քանակի մասին։ Տնօրենի խոսքով` միակ բացասական կողմն այն է, որ համակարգը կներդվի ոչ բոլոր դպրոցներում, այլ միայն, որտեղ աշակերտները շատ են։ Read more: https://armeniasputnik.am/