«Դուք իսկապես լույս եք բերել հայի աչքերին». Լևոն Ալթունյան

«25 տարի շարունակ դուք եկել եք ձեր նախաձեռնություններով։ Այսօր մեր նախաձեռնությամբ հրավիրել ենք շնորհակալություն հայտնելու 25-ամյա բեղմնավոր ձեր գործունեության համար։ 1992 թվականին դուք հանդես եք եկել մի նախաձեռնությամբ, որն իսկապես լույս է  բերել հայի աչքերին` մեր հայրենակիցներին հնարավորություն տալով տեսնելու և ապրելու լիարժեք կյանքով»,-ընդունելով Հայկական ակնաբուժության նախագծի հիմնադիր-նախագահ Ռոջեր Օհանիսյանի գլխավորած բազմանդամ պատվիրակությանը` ասել է ՀՀ առողջապահության նախարար Լևոն Ալթունյանը։IMG_1043
Պատվիրակության թվում էին ինչպես ԱՄՆ-ի, ՄԵծ Բրիտանիայի և այլ երկրների ճանաչված ակնաբույժներ, ովքեր երկար տարիներ մասնագիտական անգնահատելի աջակցություն են ցուցաբերում նախագծին, այնպես էլ ծրագիրը քաջալերող և ֆինանսավորող բարերարներ։
Նախարարն ընդգծել է, որ Հայկական ակնաբուժության նախագծի կողմից իրականացված ծրագրերի շնորհիվ ակնաբուժությունն այսօր Հայաստանում առաջատար ոլորտներից մեկն է։ Նա կարևորել է նաև ՀԱՆ-ի հայաստանյան թիմի` գրասենյակի տնօրեն Նունե Եղիազարյանի և բժշկական տնօրեն Ալեքսանդր Մալայանի ներդրումը։
ՀԱՆ-ի նախագահ Ռոջեր Օհանիսյանըևս բարձր գնահատելով Հայաստանում աշխատող թիմի և հայ բժիշկների գործունեությունը` խոստովանել է, որ շատ դեպքերում ծրագրերն իրականացվել են Ալեքսանդր Մալայանի հորդորով, քանի որ նա ավելի քաջատեղյակ է  եղել երկրի կարիքների և առաջնահերթ խնդիրների մասին։
Նախարարին ներկայացվել են Հայաստանում ակնաբուժական կլինիկաների ծավալման, Մանկական կուրության կանխարգելման բարձրակարգ կենտրոնի ստեղծման և դրանց աշխատանքների շարունակականության ապահովման, բժիշկների վերապատրաստման և այլ ծրագրերում առանցքային դերակատարություն ունեցող ճանաչված մասնագետները։
Լևոն Ալթունյանը Հայաստանի ամբողջ ժողովրդի անունից շնորհակալություն է հայտնել բոլորին անչափ կարևոր և երկարամյա առողջապահական ծրագրի իրականացման համար։
«Ես պարզապես խոսքեր չեմ գտնում հայ ժողովրդի երախտիքը Ռոջեր Օհանիսյանին հայտնելու համար։ Ձեր մարդասիրական առաքելության, Ձեր հայրենանվեր գործունեության հանդեպ որևէ մեկը չի կարող անտարբեր գտնվել»,-ասել է Լևոն Ալթունյանը։2
Ռոջեր Օհանիսյանը և Ալեքսանդր Մալայանը պատվիրակության անունից շնորհակալություն են հայտնել նախարարին` ընդգծելով, որ նախագիծը, ի դեմս նախարարության, շարունակում է իր թիկունքին զգալ հուսալի գործընկերոջ աջակցությունը։
ՀՀ առողջապահության նախարար Լևոն Ալթունյանը Հայկական ակնաբուժության նախագծի հիմնադիր-նախագահ Ռոջեր Օհանիսյանին, նախագծի բժշկական տնօրեն և Ս.Վ.Մալայանի անվան ակնաբուժական կենտրոնի տնօրեն Ալեքսանդր  Մալայանին պարգևատրել է Հայաստանի Հանրապետության առողջապահության նախարարության հուշամեդալով:
«Բժշկի համար ամենամեծ շնորհակալությունը հիվանդի գոհունակությունն է, վստահությամբ ու հավատով լի նրա հայացքը, աշակերտների հիացմունքը։ Այնուհանդերձ նախարարությունը ցանկացել է այս կերպ արտահայտել իր երախտիքը 25-ամյա գործունեությամբ արձանագրված ձեռքբերումների համար»,-ասել է Լևոն Ալթունյանը։
Նախարարը բարձր է գնահատել նաև նախագծի բոլոր բարերարների մարդասիրական և հայանվեր գործունեությունը։

ՀՀ առողջապահության նախարարություն

Leave a Reply

Your email address will not be published. Required fields are marked *

x Close

Like Us On Facebook