ԱՌԱՋԻՆ ՕԳՆՈՒԹՅՈՒՆՆ ԱՐԵՎԱՅԻՆ ԱՅՐՎԱԾՔՆԵՐԻ ԺԱՄԱՆԱԿ
Եթե արևի ուղիղ ճառագայթների տակ երկար մնալու հետևանքով կամ սխալ արևային լոգանք ընդունելու արդյունքում այրվել եք, ապա այրված մաշկի նշաններն ի հայտ կգան մի քանի ժամվա ընթացքում: Վնասված մաշկը լինում է ցավոտ, կարմիր և այտուցված: Երբեմն, այն կարող է բշտիկապատվել: Ընդհանուր երևույթներից հանդիպում են նաև գլխացավ, ջերմություն և սրտխառնոց:
Որպեսզի այրված մաշկը արագ ապաքինվի, հետևեք մի քանի պարզ խորհուրդների.
• Սառեցրեք մաշկը՝ խոնավ սրբիչը դնելով այրված մակերեսին, կամ կիսասառը ջրով լոգանք ընդունեք
• Փափկացնող, հատկապես՝ ալոե վերա պարունակող քսուքները խորը հանգստացնող ազդեցություն կունենան
• Խմեք շատ ջուր, հեղուկներ ջրազրկումը կանխելու համար
• Փոքր բշտիկներին ձեռք տալ չի կարելի: Եթե դրանք բացվում են ակամա, նրբորեն լվացեք այդ մասն օճառով և ջրով, քսեք անտիբիոտիկ պարունակող քսուք, և ծածկեք վերքային մակերեսը ստերիլ, չկպչող անձեռոցիկով: Եթե կարմրությունը չանցնի, դիմեք մասնագետին
• Ցավազրկողների օգտագործումը թույլատրելի է:
• Խուսափեք արևից այնքան, մինչև ձեր մաշկը լիարժեք կվերականգնվի
Մեծ բշտիկների առկայության դեպքում դիմեք բժշկին: Բժշկին դիմելու կարիք կլինի նաև, եթե ցավի ուժգնացում եք նկատում, գլխացավ, գիտակցության խանգարումներ, փսխում, ջերմության բարձրացում կամ բշտիկների պարունակությունը թարախային է:
Նյութի աղբյուրը՝ astghikmc.am
