Հանդիպումը միտված էր համագործակցության եզրեր գտնելուն
Ողջունելով Ասիական զարգացման բանկի պատվիրակությանը` ՀՀ առողջապահության նախարար Լևոն Ալթունյանը կարևորել է ոլորտում իրականացվող ծրագրերի, ինչպես նաև առկա խնդիրների լուծման գործում համագործակցության հնարավորություններ գտնելը։
Նախարարի տեղակալներ Սերգեյ Խաչատրյանը և Սամվել Մարգարյանը, աշխատակազմի ղեկավար Նելսոն Զուլոյանը Ասիական զարգացման բանկի առաքելության ղեկավար Ռիե Հիրաոկային և նրա գլխավորած պատվիրակությանը ներկայացրել են ոլորտի զարգացման ուղղություններն ու առաջնահերթությունները, նախարարության կողմից իրականացվող բարեփոխումներն ու ծրագրերը։
Մասնավորապես կարևորվել են ֆինանսական վերահսկողության բարելավման, պետական բյուջեից հատկացվող միջոցների առավել նպատակային և հասցեական ծախսման նպատակով իրականացվող քայլերը: Անդրադարձ է կատարվել նաև Էլեկտրոնային առողջապահական համակարգի, կլինիկական ուղեցույցների և պացիենտի վարման գործելակարգերի ներդրմանը, ինչպես նաև հիվանդանոցների կառավարման համակարգի զարգացմանը։
Քննարկումները միտված են եղել նշված ոլորտներում համագործակցության եզրեր գտնելուն։
