Ռեյի համախտանիշ (անգլ.՝ Reye syndrome), հազվադեպ հանդիպող, բայց շատ վտանգավոր հիվանդություն է,

Ռեյի համախտանիշ (անգլ.՝ Reye syndrome), հազվադեպ հանդիպող, բայց շատ վտանգավոր հիվանդություն, հիմնականում դրսևորվում է պատանիների և մանուկների մոտ (հաճախ 4-12 տարեկանում), երբ վիրուսային ծագման հիվանդությունների բուժման ժամանակ օգտագործվում է ացետիլսալիցիլաթթու։ Ռեյի համախտանիշը դրսևորում է էնցեֆալոպաթիայով (առաջանում է գլխուղեղի այտուցի հետևանքով) և լյարդի ճարպային ինֆիլտրացիայով։ Ուղեկցվում է հիպերամոնեմիայով, արյան մեջ ԱլԱՏ, ԱսԱՏ-ի բարձրացմամբ, սակայն պահպանվում է բիլիռուբինի նորմալ քանակը։ Ռեյի համախտանիշի առաջացման պատճառը օքսիդացիոն ֆոսֆորիլացման և β-օքսիդացման խանգարման հետևանքով առաջացող միտոքոնդրիումների քայքայումը կամ վնասումն է։

Առաջին անգամ նկարագրել է Դուգլաս Ռեյը 1963 թվականին։ Համախտանիշի ժամանակ լյարդը 40%-ով մեծանում է, սակայն դեղնախտ դիտվում է հազվադեպ։ Համախտանիշի կանխման համար պետք է պահպանել հետևողականություն մինչև 12 տարեկան երեխաներին ացետիլսալիցիլաթթու նշանակելիս։ Բուժման ոչ մի մեթոդ չի կանխում համախտանիշի զարգացումը։ Սակայն վաղ ախտորոշումը և ինտենսիվ թերապիան ուղղված են կյանքի համար կարևոր ֆունկցիաների պահպանմանը, այդ թվում շնչառությանը և արյան շրջանառությանը։ Անհրաժեշտության դեպքում կատարվում է հեղուկների, էլեկտրոլիտների, գլյուկոզայի, ինչպես նաև վիտամին K-ի (անբավարարությունն առաջացնում է արյունահոսություն) ներերակային հեռացում։ Ներգանգային ճնշման իջեցման համար նշանակվում է մաննիտոլ, կորտիկոստերոիդներ։