Աբորտի պատրաստվող կնոջը մտածելու համար տրվում է առնվազն 3 օր
Այժմ հղիության արհեստական ընդհատման համար դիմող կնոջը տրվում է առնվազն 3 օր ժամանակ։ Այս մասին, սեպտեմբերի 28-ին լրագրողներին հայտնեց ՀՀ առողջապահության նախարարության մայրական եւ վերարտադրողական առողջության պահպանման բաժնի պես Գայանե Ավագյանը։
«Այդ ընթացքում կինը մեկ անգամ եւս կարող է մտածել, խորհդակցել բուժաշխատողների, ընտանիքի անդամների հետ։ Նրան տրվում է նաեւ աբորտի հետեւանքների մասին տեղեկատվություն», – նշեց Գայանե Ավագյանը։
Նա հայտնեց, որ այս փոփոխության շնորհիվ բազմաթիվ կանայք հետ են կանգնել հղիության արհեստական ընդհատման մտքից։
«Այնուամենայնիվ, եթե կինը, որոշում է դիմել այդ քայլին մինչեւ հղիության 12 շաբաթականը, նրան ոչ ոք չի կարող արգելել», – հայտնեց Գայանե Ավագյանը։
NEWS.am Medinicine-ի թղթակցի հարցին, թե ինչպես ՌԴ-ում եւ արեւմուտքում է ընդունված, Հայաստանի բուժհաստատություններում կա՞ն հոգեբաններ, որոնք կարող են զրուցել աբորտի համար դիմած կնոջ հետ, Գայանե Ավագյանը պատասխանեց, որ հոգեբանների առկայությունը նման դեպքերում անհրաժեշտ է համարում, սակայն, ցավոք, Հայաստանում ոչ բոլոր բժշկական հաստատություններն են ի վիճակի ունենալու իրենց հոգեբանը։ Այդ բացը փորձում են լրացնել բժիշկները։
