«Էրեբունի» ԲԿ-ում հեռացվել է գլխուղեղի մեկ քառորդն ընդգրկող չարորակ մեծ ուռուցք
70-ամյա կնոջ մոտ հարազատները վերջին մեկ ամսվա ընթացքում նկատել էին խոսքի արտաբերման և ինֆորմացիայի ընկալման դժվարություններ: Ժամանակի ընթացքում կինը սկսել էր գանգատվել թուլությունից, այնուհետև ի հայտ էին եկել քայելու, կողմնորոշվելու և խոսելու լուրջ խանգարումներ: Աշտորոշման նպատակով դիմել էին «Էրեբունի» ԲԿ:
Հիվանդին ընդունել և առաջնային խորհրդատվությունն իրականացրել է նյարդավիրաբուժության բաժանմունքի բժիշկ, նյարդավիրաբույժ Սարգիս Եղունյանը: Լաբորատոր-գործիքային հետազոտությունների արդյուքնում հայտնաբերվել է ճակատային բլթի շատ մեծ չափերի՝ 9,5 սմ գոյացություն, որն ընդգրկում էր գլխուղեղի մեկ քառորդը, ճնշում ուղեղի հյուսվածքները, խոսակցական կենտրոնները։ Որոշում է ընդունվել կատարել վիրահատություն՝ հեռացնել ուռուցքը: Վիրահատության ընթացքում Սարգիս Եղունյանը կատարել է ուռուցքի ամբողջական հեռացում, որից անմիջապես մեկ օր հետո հիվանդի մոտ նկատվել է դրական դինամիկա, իսկ 2 օր անց վերականգնվել է նաև հիվանդի խոսքը:
Կատարված հիստոլոգիական հետազոտության արդյուքներով պարզ է դարձել, որ մեծ չափերի գոյացությունն ունի չարորակ բնույթ: Ուստի հիվանդին վիրահատությունից հետո ցուցվել է հետագա բուժում՝ քիմիաթերապիա:
