Ինչպես է գոլ ջուրը նպաստում քաշի նվազմանը․ հինգ պատճառ առավոտյան գոլ ջուր խմելու համար

Ավելորդ քաշից ազատվելու մասին շատերն են երազում, սակայն ոչ միշտ են ձեռնարկված միջոցներն օգնում հասնել ցանկալի արդյունքին։ Այս խնդրի դեմ պայքարի ամենապարզ ու հասանելի միջոցներից մեկն առավոտյան դատարկ ստամոքսին գոլ ջուր խմելն է, սակայն այս մեթոդի արդյունավետությանը ոչ բոլորն են վստահում։ Այնուամենայնիվ այն իսկապես բավական արդյունավետ է, քանի որ դատարկ ստամոքսին գոլ ջուր խմելը դրական ազդեցություն է ունենում օրգանիզմի տարբեր համակարգերի աշխատանքի վրա՝ այդ կերպ օգնելով ազատվել մի շարք խնդիրներից, այդ թվում նաև ավելորդ քաշից։

Մասնագետները ներկայացրել են, թե ինչ փոփոխություններ են տեղի ունենում օրգանիզմում գոլ ջրի շնորհիվ և ինչպես է այն նպաստում քաշի նվազմանը։

Խթանում է նյութափոխանակությունը

Գոլ ջուրը բարձրացնում է մարմնի ջերմաստիճանը, ինչն արագացնում է նյութափոխանակությունն ու խթանում ճարպերի այրման գործընթացը։ Առավոտյան մի կտոր կիտրոնով գոլ ջուր խմելն օգնում է օրգանիզմին ավելի լավ տարրալուծել ճարպերը՝ նպաստելով քաշի նվազմանը։ Բացի այդ, կիտրոնը պարունակում է պեկտին, որը մեղմում է քաղցի զգացումը՝ օգնելով խուսափել ավելորդ կալորիաներից։

Բարելավում է մարսողությունը

Դատարկ ստամոքսին գոլ ջուր խմելու սովորությունը դրական ազդեցություն է ունենում լյարդի և երիկամների աշխատանքի վրա։ Գոլ ջուրն օգնում է տարրալուծել սննդային միացություններն ու բարելավում է մարսողության գործընթացը։ Այն խոնավացնում է մարսողական համակարգի օրգանները, ինչը դրական ազդեցություն է ունենում դրանց աշխատանքի վրա՝ օգնելով ավելի լավ մաքրել օրգանիզմը վնասակար տարրերից։

Կանխում է փորկապության զարգացումը

Առավոտյան գոլ ջուր խմելն օգնում է մաքրել աղիներն ու խթանում է դրանց աշխատանքը, իսկ աղիների ակտիվության պահպանումը  փորկապության, փորափքանքի և որովայնի ցավերի կանխարգելման լավագույն միջոցն է։ Բացի այդ, աղիների ճիշտ աշխատանքը շատ կարևոր նշանակություն ունի նաև կազմվածքի համար, քանի որ օգնում է խուսափել քաշի ավելացումից։

Խոնավացնում է օրգանիզմը

Ավելորդ քաշի նվազեցման հարցում շատ կարևոր նշանակություն ունի նաև օրգանիզմի բավարար խոնավացումը, ինչն առհասարակ շատ կարևոր է առողջության համար։ Բացի այդ, ջուրն ազատում է քաղցի զգացումից, ինչն օգնում է նվազեցնել օրվա ընթացքում օգտագործվող կալորիաների քանակությունը։

Բարելավում է արյան շրջանառությունը

Առավոտյան գոլ ջուր խմելն օգնում է օրգանիզմից դուրս բերել այն վնասակար տարրերը, որոնք կուտակվում են նյարդային համակարգում և առհասարակ ամբողջ մարմնում։ Սա իր հերթին խթանում է արյան շրջանառությունը՝ բարելավելով ընդհանուր ինքնազգացողությունը։ Բացի այդ, գոլ ջուրը թուլացնում է մկաններն ու բարելավում արյան հոսքը։

Նյութի աղբյուրը՝ med.tert.am