Համակարգչային տոմոգրաֆիայի (CT) դերը հաստ աղու քաղցկեղի ժամանակ
Նյութը aroxjblog.am -ին տրամադրեց “Շենգավիթ” ԲԿ-ի բժիշկ-ռադիոլոգ Գայանե Ժորայի Բունիաթյանը, ով ներկայացրեց համակարգչային տոմոգրաֆիայի (ՀՇ) դերը հաստ աղու քաղցկեղի ժամանակ:
Կոլոռեկտալ քաղցկեղը հանդիսանում է աղեստամոքսային տրակտի ամենատարածված ուռուցքային հիվանդությունը: Կոլոռեկտալ քաղցկեղին է բաժին հասնում 15%-ը բոլոր առաջնային ախտորոշված քաղցկեղների և որպես կանոն առավել հաճախ հանդիպում է մեծահասակների՝ հատկապես տղամարդկանց մոտ, զբաղեցնելով երկրորդ տեղը (միջինը 60-80տ.): Կոլոռեկտալ քաղցկեղը կարող է հանդիպել հաստ աղու ցանկացած հատվածում հետևյալ հաճախականությամբ՝
- 55% ռեկտոսիգմոիդալ հատված
- 20% կույր աղի և վերել հաստ աղի
- 2% իլեոցեկալ փականի շրջանում
- ~ 10% լայնական հաստ աղի
- ~ 5% վայրէջ հաստ աղի
Ռիսկի գործոններն են.
- հետազոտությունները և կլինիկական դիտարկումները հանգեցնում են այն մտքին, որ գոյություն ունի հետադարձ կապ ընդունած սննդամթերքի և հաստ աղու քաղցկեղի առաջացման միջև, այն է՝ բջջանյութի ցածր պարունակությամբ և կենդանական ճարպերի բարձր պարունակությամբ սննդակարգը, ռաֆինացված ածխաջրերով հարուստ սնունդը
- ճարպակալումը, նստակյաց ապրելակերպը՝ հատկապես տղամարդկանց մոտ
- աղիքի բորբոքային հիվանդությունները (Կրոնի հիվանդություն, ՈՍԽԿ)
- ազբեստի ազդեցությունը օրգանիզիմի վրա
- կոլոռեկտալ ուռուցքների ընտանեկան պատմություն
- կրծքագեղձի, էնդոմետրիումի քաղցկեղ անամնեզում
- հաստ աղու ադենոման
- որոշ ժառանգական համախտանիշները (ընտանեկան ադենոմատոզ պոլիպոզը, յուվենիլ պոլիպոզ և այլն):
Համակարգչային շերտագրման իրականացման ցուցում է հանդիսանում անհայտ պատճառի անեմիան (սակավարյունությունը), քաշի կորուստը, կղանքում արյան առկայությունը, երկարատև փորլուծությունը և/կամ փորկապությունը:
Կոլոռեկտալ քաղցկեղի սկզբնական շրջանում կլինիկական դրսևորումները աղքատիկ են, երբեմն նաև բացակայում են: Հնարավոր է փորլուծություն կամ փորկապություն, երկաթ դեֆիցիտային անեմիա: Երբեմն սկզբնական ախտանիշները կարող են դրսևորվել սուր աղիքային անանցանելիության, աղիքային արյունահոսության տեսքով:
Հաստ աղու քաղցկեղի ախտորոշման հարցում մեծ դեր ունի կոլոնոսկոպիան և ՀՇ-ն, վերջինս ընտրության մեթոդ է նաև հաստ աղու քաղցկեղի ժամանակ հանդիպող բարդությունների հայտնաբերման հարցում:
Համակարգչային տոմոգրաֆիան (ՀՇ) հնարավորություն է տալիս.
- գնահատել ախտահարված աղիքի պատը, լուսանցքը,
- հայտնաբերել և ճշգրիտ նշել առաջնային ուռուցքի տեղակայումը
- հայտնաբերել ուռուցքի ներաճը հարակից անատոմիական կառույցներ,
- հայտնաբերել հեռակա մետաստազները ՝ թոքերում, լյարդում, որովայնամզի թերթիկներում, ոսկրերում, գլխուղեղում,
- գնահատել առողջ աղիքի երկարությունը, անատոմիական առանձնահատկությունները
- պլանավորել վիրահատական եղանակով բուժման ծավալը:
Պացիենտի հետագա ռադիլոգիական հսկողությունը իրականացվում է ըստ ուղեցույցների սահմանված ժամանակացույցով:
Ժամանակակից համակարգչային տոմոգրաֆները թույլ են տալիս իրականացնել վիրտուալ կոլոնոսկոպիա, որը երբեմն կարելի է դիտարկել որպես լրացուցիչ ինֆորմացիայի աղբյուր կամ, երբ հնարավոր չէ իրականացնել դասական կոլոնոսկոպիան (հակացուցումների կամ տեխնիկական դժվարությունների առկայության դեպքում), սակայն պետք է նշել, որ վիրտուալ կոլոնսկոպիան չի փոխարինում դասական կոլոնոսկոպիային:
Հիվանության վաղ ճշգրիտ ախտորոշումը հաջող բուժման գրավականն է:
Եղե՛ք առողջ:
Բժշկի հետ կապ հաստատելու և հարցերի դեպքում կարող եք գրել aroxjblog.am -ին կամ զանգահարել ՝ 033393930 համարին: