Հասարակ Հերպես

Հասարակ հերպես հիվանդության հարուցիչը հերպես վիրուսի առաջին տիպն է, ինչպես նաև կարող է հարուցվել երկրորդ տիպով։ Երկուսն էլ կարող են առաջացնել ցանավորում թե՛ բերանի լորձաթաղանթին, շրթունքներին և թե՛ սեռական օրգանների շրջանում ( ժամանակին տարանջատում էին, որպես Հերպես 1ը շրթունքային հերպեսի, իսկ 2-ը’ սեռական հերպեսի հարուցիչներ): Սթրեսը, տարբեր հիվանդությունները, դաշտանը և նույնիսկ երկարատև արևի լույսը կարող են խթան հանդիսանալ հերպեսի արտահայտման համար։

Սովորաբար հերպեսը սկսվում է մրմռոցից, քորից կամ այրոցի ու ցավի զգացողությունից: Դրանից հետո հայտնվում են փոքր բշտիկներ, որոնք լցված են հեղուկով, իսկ հետո դրանք պայթում են և ծածկվում կեղևիկներով։ Դրանք կարող են լինել դեմքի ցանկացած վայրում:

Հերպեսը վարակիչ է այն պահից, երբ մարդն առաջին անգամ զգում է մրմռոցը կամ արտահայտվում են այլ նշաններ, մինչև այն ամբողջովին ապաքինվի: Եթե հերպեսը պարբերաբար ու հաճախ կրկնվում է, ապա հակավիրուսային միջոցները կարող եք օգտագործել ծակծկոցների ի հայտ գալուն պես:

Ինչ կարող եք անել ինքնուրույն

• օգտագործել արևապաշտպանիչ շրթունքների բալզամ SPF 15 կամ ավելի բարձր, եթե արևի տակ եք.

• կիրառել կոմպրես: Սառը կոմպրեսները կնվազեցնեն կարմրությունը, կօգնեն հեռացնել կեղևիկները և կարագացնեն բուժումը, մինչդեռ տաք կոմպրեսները կթեթևացնեն ցավը.

• ձեռքերը մանրակրկիտ լվացեք օճառով և ջրով, նախքան ինքներդ ձեզ և այլ մարդկանց դիպչելը, ներառյալ կրեմ քսելուց առաջ և հետո:

• խմեք պարացետամոլ կամ իբուպրոֆեն, եթե բարձր ջերմություն ունեք կամ արտահայված ցավ: Ցավը կարող եք մեղմել լիդոկայինով կամ բենզոկայինով նրբաքսուքներով;

• օգտագործեք սառը, փափուկ սնունդ և խմեք շատ հեղուկներ:

Եթե ունեք հերպես, մի համբուրեք և մի կիսվեք այն բաներով, որոնք շփվել են հերպեսի ցանի հետ, ինչպիսիք են սրբիչը, դանակ-պատառաքաղը, ,,հերպեսի կրեմը,, կամ շրթներկը: Խորհուրդ չի տրվում օրալ սեքսը մինչև հերպեսի ամբողջական ապաքինումը, հակառակ դեպքում մեծանում է ձեր զուգընկերոջը սեռական հերպեսով վարակվելու վտանգը: Աշխատեք չդիպչել հերպեսի ցանին(երկրորդային ինֆեկցումից խուսափելու համար), բացառությամբ այն դեպքերում, երբ կրեմ եք քսում է, իսկ կրեմը պետք է բարակ քսել և առանց տրորելու։

Հերպեսն ինքնին անցնում է մոտ տաս օրվա ընթացքում: Եթե մտահոգված եք ցավով, քորով և այրոցի զգացողությունով, ցանի հաճախակի կրկնությամբ, ապա կարող եք դիմել մաշկաբանի։

Ձեր մաշկաբանը կարող է նշանակել հակավիրուսային դեղամիջոցներ` հաբեր և/կամ նրբաքսուքներ, հերպեսի ցավը, քորը մեղմացնելու կամ ապաքինումը արագացնելու համար: Ինչպես նաև կարող է անհրաժեշտ լինել որոշակի հետազոտություններ, հաճախակի կրկնումների պատճառները հասկանալու համար։

Նյութը տրամադրեց բժիշկ Արամ Շահվերդյանը Aram Shahverdyan