Երեխայի ատամների հիգիենան. ե՞րբ պետք է փոքրիկը սկսի լվանալ ատամները
Երեխայի ատամների մաքրության մասին, ըստ բժիշկների, պետք է սկսել հոգ տանել դրանց ի հայտ գալուց ի վեր:
Ճիշտ է, երեխայի առաջին ատամները կաթնատամներ են, որոնք շուտով փոխարինվելու են հիմնական ատամներով, սակայն դրանց խնամքը ևս կարևոր է: Այսպիսով, երեխան փոքր տարիքից սովորում է հոգ տանել իր ատամների մասին: Կարևոր է նաև կաթնատամների առողջությունը, քանի որ փչացած ատամները կարող են ցավել և պատճառ դառնալ, որ երեխան լավ չսնվի: Բացի այդ, փչացած ատամները կարող են երեխաների մոտ անլիարժեքության կոմպլեքս առաջացնել:
Մանուկների ատամները պետք է լավ խնամվեն, սակայն հաճախ նրանք կամակորություն են անում՝ հրաժարվելով ատամները խոզանակով լվանալ: Նման իրավիճակից խուսափելու համար հոգեբանները խորհուրդ են տալիս դիմել մի շարք մեթոդների, օրինակ՝ ունենալ ավազե ժամացույցով խաղալիք և առաջարկել, որ երեխան մրցի ու ատամները խոզանակով լվանա, մինչև ավազի՝ մի տարայից մյուսի մեջ լցվելը:
Դարձե՛ք օրինակ երեխայի համար
Եթե դուք ինքներդ ամեն օր պարտաճանաչորեն ատամ եք լվանում, ապա, ամենայն հավանականությամբ, ձեր երեխան կհետևի ձեր օրինակին և ուրախությամբ խոզանակը ձեռքը կվերցնի:
Եղե՛ք հետևողական
2 տարեկան հասակից սկսած երեխաները պետք է կանոնավորապես առավոտյան և երեկոյան մաքրեն ատամները: Մշակե՛ք օրվա հստակ գրաֆիկ և հետևե՛ք դրան: Երեխան աստիճանաբար կսովորի ամենօրյա պարտադիր «ծեսին»:
Գործե՛ք միասին
Եթե մայրիկի համոզելը չի օգնում, օգնության կանչեք նաև հայրիկին: Հայրիկը կարող է գրկել երեխային, զբաղեցնել, իսկ մայրիկն այդ ընթացքում խոզանակով փոքրիկի ատամները լվանալ:
Հեքիաթ պատմեք
Հորինե՛ք մի հետաքրքիր պատմություն, որտեղ հեքիաթային ձևով կներկայացնեք, որ անհրաժեշտ է ամեն օր ատամները լվանալ: Կարող եք, օրինակ, պատմություն հորինել, թե ինչպես է ոստիկան Ատամի խոզանակը բռնում հանցագործ Կարիեսին, որն ավերում է տնակ-ատամները:
Տիկնիկային թատրոն բեմադրեք
Փոքրիկ խաղալիքներով` ցանկալի է մեծ և սպիտակ ատամներ ունեցող, տիկնիկային ներկայացում կազմակերպեք և փոքրիկին պատմեք, թե ինչպես էին ցավում հերոս-խաղալիքի ատամները, երբ նա իր ատամները չէր լվանում:
Մրցանակ՝ արված գործի համար
Ասացե՛ք երեխային, որ եթե ատամները չլվանա, կզրկվի քաղցրավենիքից, և դուք այն կտաք մյուս փոքրիկներին, որոնք ամեն օր ատամ են լվանում:
Նյութը ՝ impoqrik.am
