Ինչ անել երբ ցավում է երեխայի ականջը
Ականջի ցավի պատճառ կարող է լինել արտաքին լսողական ուղու բորբոքումը, որը կոչվում է նաև <լողորդի ականջ> և միջին ականջի բորբոքումը: Երբեմն ականջացավի հետ շփոթում են հարականջային գեղձի բորբոքումը, օրինակ՝ խոզուկի ժամանակ, կամ ատամնացավը , քանի որ երեխան չի կարող ճշտորեն ցույց տալ, թե որտեղ է ցավում:
Ախտանշանները
Եթե երեխան կարողանում է խոսել, ապա կասի որ ականջը ցավում է, իսկ ավելի փոքր երեխաները լաց են լինում և ձեռքը տանում են դեպի ականջը: Պառկելիս ականջի ցավը ուժեղանում է, այդ պատճառով րեխան դժվար է քնում: Միջին ականջի բորբոքումը հաճախ ուղեկցում է շնչառական վարակներին և ընթանում է ինքնազգացողության վատացմամբ և ջերմության բարձրացմամբ: Միջին ականջում հեղուկի կուտակումը կարող է լսողության ժամանակավոր վատացման պատճառ դառնալ: Միջին ականջի բորբոքման դեպքում երբեմն թմբկաթաղանթը պատռվում է, և ականջից դեղնավուն հեղուկ կամ թարախ է արտահոսում:
Բուժումը
Եթե Ձեր երեխան ականջի ցավ ունի, դիմեք մանկաբույժին, իսկ անհրաժեշտության դեպքում ՝ նաև քիթ-կոկորդի բժշկին: Առանց բժշկի խորհրդի ականջի մեջ ոչինչ մի կաթացրեք (հատկապես ձեթ և խոտբույսերի մզվածք): Խստորեն հետևեք բժշկի ցուցումներին: Սովորաբար ջերմությունն իջնում և ցավը մեղմանում է 3 օրվա ընթացքում, բայց բուժումը անհրաժեշտ է շարունակել այնքան ժամանակ, որքան նշանակել է բժիշկը, այլապես հիվանդությունը կարող է կրկնվել: